काठमाडौं– नेकपा एमालेले सदस्यता नवीकरण रोक्ने निर्णय गरेपछि पूर्वराष्ट्रपति विद्यादेवी भण्डारीले तीव्र प्रतिक्रिया दिएकी छन् । शुक्रबार काठमाडौंमा आयोजित पत्रकार सम्मेलनमा बोल्दै उनले आफूलाई कुनै ‘मुट्ठीभर मानिस’ले रोकेर थाम्न नसक्ने स्पष्ट पारिन् ।
भण्डारीले भनिन्, ‘मैले सचेततापूर्वक राष्ट्रपतिको कार्यकाल पूरा गरेपछि राजनीतिमा फर्किन पार्टी सदस्यता नवीकरण गरेकी हुँ । तर केही मुठ्ठीभरले हुलहुज्जत गरेर रोक्न खोजिरहेका छन् ।’
पूर्वराष्ट्रपतिका अनुसार उनी ३५ वर्ष एमालेको सक्रिय राजनीतिमा लागेपछि राष्ट्रपतिमा पुगेकी थिइन् । उनले भनिन्, ‘मैले राष्ट्रपतिमा जाँदा एमाले छाडेकी होइन, विधिपूर्वक सदस्यता नवीकरण गरेको हो । म आज पनि एमालेको परिवारमै छु’, उनले भनिन् ।
एमाले प्रवेशमा हाल आफूलाई रोकिएको गुनासो गर्दै उनले भनिन्, ‘पार्टी सदस्यता लिएको ४५ वर्ष भइसक्यो । जननेता मदन भण्डारीले सदस्यता दिलाएका थिए । मेरो सदस्यता कसैले खान सक्दैन ।’
एमालेभित्र भण्डारीको सक्रिय राजनीतिमा पुन: प्रवेशलाई लिएर हाल विवाद चुलिएको छ । पार्टी नेतृत्वको निर्णयले भण्डारीलाई संस्थागत रूपमा रोक्ने प्रयास भइरहेको देखिन्छ भने भण्डारीले सार्वजनिक रूपमा त्यसको कडा प्रतिवाद गरेकी छन् ।
