काठमाडौं – अस्ट्रेलियाका ओपनर ब्याटर ट्राभिस हेडले आगामी आईपीएल २०२७ को सिजन नखेल्ने निर्णय गरेका छन्। उनले यस निर्णयबारे आफ्नो टोली सनराइजर्स हैदराबादलाई जानकारी गराइसकेका छन्।
हेडको यो निर्णयसँगै आईपीएलमा निकै चर्चामा रहेको उनी र अभिषेक शर्माको ओपनिङ जोडी ‘ट्राभिशेक’ टुट्ने भएको छ। क्रिकइन्फोका अनुसार व्यस्त अन्तर्राष्ट्रिय खेल तालिकाका कारण आफ्नो कार्यभार व्यवस्थापन गर्न हेडले आईपीएलबाट विश्राम लिने निर्णय गरेका हुन्। सन् २०२७ मा अस्ट्रेलियाले २० टेस्ट खेल खेल्ने तालिका छ।
यसका साथै जुनमा विश्व टेस्ट च्याम्पियनसिप फाइनल, त्यसपछि इंग्ल्यान्डसँग एसेज शृङ्खला र अक्टोबर-नोभेम्बरमा एकदिवसीय विश्वकप आयोजना हुनेछ। लगातारको खेल तालिकाका कारण शारीरिक र मानसिक थकान कम गर्न उनले यो कठिन निर्णय लिएका हुन्। हेडको यो निर्णय अस्ट्रेलियाका मुख्य प्रशिक्षक एन्ड्र्यु म्याकडोनाल्डले यसअघि नै संकेत गरेका थिए।
आईपीएल २०२७ को खेलाडी लिलामी आगामी डिसेम्बर १६ मा गोवामा हुँदैछ। हेड बाहिरिएपछि हैदराबादको खेलाडी खरिद बजेटमा १४ करोड भारतीय रुपैयाँ थपिनेछ। सन् २०२४ को अक्सनमा ६ करोड ८० लाख भारतीय रुपैयाँमा अनुबन्धित भएका हेडले सनराइजर्स हैदराबादका लागि उत्कृष्ट प्रदर्शन गरेका थिए। उनले सन् २०२४ को सिजनमा १९१.५५ को स्ट्राइक रेटमा ५६७ रन बनाएका थिए।
हेड र अभिषेक शर्माको जोडीले आईपीएल इतिहासमै तीव्र गतिमा रन बनाउने कीर्तिमान कायम गरेको थियो। उनीहरूले प्रतिओभर १२.२७ रनको औसतमा रन जोडेका थिए। ४२ इनिङ्समा ४६.१४ को औसतमा १ हजार ८९२ रनको साझेदारी गरेका उनीहरूको नाममा ६ शतकीय र ९ अर्धशतकीय साझेदारी रहेका छन्।