काठमाडौं । नेपाल प्रिमियर लिग (एनपीएल) को तेस्रो संस्करणको पहिलो क्वालिफायरमा सुदूरपश्चिम रोयल्सले लुम्बिनी लायन्ससामु १०६ रनको लक्ष्य प्रस्तुत गरेको छ ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको सुदूरपश्चिमले निर्धारित २० ओभरमा ८ विकेट गुमाएर १०५ रन बनायो ।
सुदूरपश्चिमका कप्तान दीपेन्द्रसिंह ऐरीले सर्वाधिक ५२ रन बनाए । उनले ५१ बलमा ३ चौका र १ छक्का प्रहार गर्दै अर्धशतकीय इनिङ्स खेले । त्यस्तै, इशान पाण्डेले ३३ बलमा ३ चौकासहित २७ रन जोडे ।
दीपेन्द्र र इशानबाहेक अन्य ब्याटरले दोहोरो अंकमा रन बनाउन सकेनन् । लुम्बिनीका रुबेन ट्रम्पलम्यानले २ विकेट लिए भने शेर मल्लले पनि २ विकेट हात पारे । अभिषेक गौतम र किशोर महतोले समान १ विकेट लिए ।
लिग चरणमा उत्कृष्ट प्रदर्शन गरेको लुम्बिनी पाँच जित, एक हार र एक खेल वर्षाका कारण रद्द भएपछि ११ अंकसहित तालिकाको शीर्ष स्थानमा रहँदै पहिलो क्वालिफायरमा पुगेको हो । सुदूरपश्चिमले सात खेलमा पाँच जित र दुई हारसहित १० अंक जोडेर दोस्रो स्थान हासिल गरेको थियो ।
पहिलो क्वालिफायर जित्ने टोलीले शनिबार हुने फाइनलमा स्थान सुरक्षित गर्नेछ भने पराजित हुने टोली बिहीबार हुने दोस्रो क्वालिफायरमा इलिमिनेटरको विजेतासँग फाइनल प्रवेशका लागि प्रतिस्पर्धा गर्नेछ ।