चन्दा क्षेत्री/काठमाडौं । नेपाल प्रिमियर लिग (एनपीएल) को पहिलो क्वालिफायरमा लुम्बिनी लायन्ससँग पराजित भएपछि सुदूरपश्चिम रोयल्सका निर्देशक जगत टमटाले ब्याटिङमा अपेक्षित प्रदर्शन गर्न नसक्नु नै हारको प्रमुख कारण रहेको बताएका छन् । उनले विदेशी खेलाडीको छनोटदेखि प्रतियोगिताको अवधि र पिचको गुणस्तरसम्म सुधार गर्नुपर्ने आवश्यकता पनि औँल्याएका छन् ।
मंगलबार कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको खेलमा सुदूरपश्चिमले दिएको १०६ रनको लक्ष्य लुम्बिनीले १६.४ ओभरमा चार विकेट गुमाएर पूरा गरेको थियो । पहिले ब्याटिङ गरेको सुदूरपश्चिमले निर्धारित २० ओभरमा आठ विकेट गुमाउँदै १०५ रन मात्रै बनाउन सकेको थियो ।
खेलपछि पोस्टम्याचमा टमटाले कम्तीमा १३० रन बनाउन सकेको भए खेलको नतिजा फरक हुन सक्ने बताए । लुम्बिनीका बलरले राम्रो स्विङ गराउँदा आफ्ना ब्याटरले त्यसलाई सामना गर्न नसकेको उनको भनाइ थियो ।
‘उनीहरूले राम्रो स्विङ गरिरहेका थिए र हामीले त्यसलाई राम्रोसँग खेल्न सकेनौँ । एउटा सानो साझेदारी भए पनि समग्रमा उनीहरूले हामीभन्दा राम्रो क्रिकेट खेले,’ टमटाले भने ।
सुदूरपश्चिमका कप्तान दीपेन्द्रसिंह ऐरीले ५२ र इशान पाण्डेले २७ रन बनाउनु बाहेक अन्य ब्याटरले उल्लेख्य योगदान दिन सकेनन् । नयाँ विदेशी खेलाडी जर्ज मन्से र थानुका डबारेबाट पनि अपेक्षित प्रदर्शन हुन नसकेको टमटाले स्वीकार गरे । दुवै खेलाडी राम्रो क्षमता भएका भए पनि यस खेलमा चल्न नसक्दा टोली दबाबमा परेको उनको विश्लेषण थियो ।
ब्याटिङको कमजोरीसँगै टमटाले खेलाडी छनोट र अनुबन्धको प्रक्रियामा पनि पुनर्विचार गर्नुपर्ने संकेत गरेका छन् । उनका अनुसार यसपटक विदेशी खेलाडीलाई पूरै सिजन उपलब्ध गराउन नसक्नु टोलीका लागि चुनौती बन्यो । प्रतियोगिता लामो हुँदा विदेशी खेलाडीलाई लामो समयसम्म अनुबन्ध गरेर राख्न कठिन भएको उनको भनाइ थियो । आगामी संस्करणमा खेलाडी छनोट गर्दा समग्र सिजनलाई ध्यान दिनुपर्ने उनले बताए ।
प्रतियोगिताको अवधि छोट्याउन सकिए विदेशी खेलाडीको उपलब्धता सहज हुने उनको सुझाव छ । एनपीएलले नेपाली क्रिकेटलाई अन्तर्राष्ट्रियस्तरमा चिनाउन महत्त्वपूर्ण भूमिका खेलेको उल्लेख गर्दै उनले नेपाल क्रिकेट संघको प्रयासको प्रशंसा पनि गरे ।
त्यसैगरी, उनले प्रतियोगितामा पिचको गुणस्तर सुधार गर्नुपर्ने आवश्यकता औँल्याए । मैदान व्यवस्थापन र ग्राउन्ड स्टाफले वर्षाका कारण खेल प्रभावित हुँदा पनि निरन्तर मेहनत गरेर खेल सञ्चालनमा सहयोग पुर्याएको भन्दै उनले प्रशंसा गरे । तर, समग्र क्रिकेटको स्तर उकास्न विकेटको गुणस्तरमा थप ध्यान दिनुपर्ने उनको भनाइ थियो ।
यसबीच टमटाले नेपाली खेलाडीले अझ बढी जिम्मेवारी लिनुपर्नेमा जोड दिएका छन् । विदेशी खेलाडीबाट सहयोग अपेक्षा गरिए पनि अवसर पाएका नेपाली खेलाडीले आफ्नो क्षमता प्रमाणित गर्नुपर्ने उनको धारणा छ । कठिन परिस्थितिमा कप्तान दीपेन्द्र र इशानले गरेको साझेदारीलाई उनले सकारात्मक रूपमा लिएका छन् । नेपाली ब्याटरले जिम्मेवारी लिएर प्रदर्शन गर्नु नेपाली क्रिकेटकै लागि सुखद पक्ष भएको उनले बताए ।
सुदूरपश्चिमका युवा तीव्र गतिका बलर हेमन्त धामीको प्रदर्शनबाट पनि टमटा सन्तुष्ट देखिए । १९ वर्षको उमेरदेखि नै आफूले धामीलाई नियालिरहेको उल्लेख गर्दै उनले धामीमा राम्रो स्विङ बलिङ गर्ने क्षमता रहेको बताए । केही अनुभव आवश्यक भए पनि उनको प्रदर्शनले राष्ट्रिय टोलीमा पुनरागमनको सम्भावना देखाएको टमटाको विश्वास छ ।
लगातार तेस्रो सिजन फाइनल पुग्ने लक्ष्य राखेको सुदूरपश्चिमले पहिलो क्वालिफायरमा पराजय बेहोरे पनि उपाधि यात्राको अवसर गुमाएको छैन । लुम्बिनीसँगको हारलाई मनोवैज्ञानिक दबाबका रूपमा नलिएको स्पष्ट पार्दै टमटाले आगामी खेलमा अझ राम्रो क्रिकेट खेल्ने विश्वास व्यक्त गरे । हारको कारण खोजेर बस्नुभन्दा आफ्नो खेल सुधार गर्दै बलियो भएर फर्कनु टोलीको प्राथमिकता रहेको उनले बताए ।
पहिलो क्वालिफायर जितेको लुम्बिनी लायन्स भने सिधै फाइनलमा प्रवेश गरेको छ । अब सुदूरपश्चिमले फाइनल पुग्नको लागि दोस्रो क्वालिफायर जित्नुपर्नेछ ।