काठमाडौं । नेपालबाट मनसुन बाहिरिने क्रम सुरु भए पनि आगामी केही दिन वर्षाको गतिविधि बढ्ने मौसमविद्हरूले बताएका छन्। मौसमविद्का अनुसार आजदेखि पर्सिसम्म देशका विभिन्न भूभागमा वर्षाको सम्भावना तुलनात्मक रूपमा बढी रहनेछ।
त्रिभुवन विश्वविद्यालयको जल तथा मौसम विज्ञान केन्द्रीय विभागका सहप्राध्यापक डा. विनोद पोखरेलका अनुसार पूर्वी नेपालमा मनसुनी प्रणालीको प्रभाव कायमै रहनुका साथै बंगालको खाडी र अरेबियन सागरबाट जलवाष्पयुक्त वायु नेपालतर्फ आइरहेकाले वर्षाको गतिविधि बढ्ने सम्भावना छ।
उनका अनुसार हालको मौसमी अवस्था हेर्दा दशैंको घटस्थापनाको अघिल्लो दिनसम्म देशका धेरै स्थानमा वर्षा हुने सम्भावना छ। घटस्थापनाको दिन भने वर्षाको गतिविधि केही कम हुनसक्ने उनको अनुमान छ।
मौसम विज्ञान विभागको मौसम पूर्वानुमान महाशाखाकी मौसमविद् माधवी सिग्देलले पनि आजदेखि आगामी तीन दिनसम्म देशका विभिन्न स्थानमा छिटपुटदेखि मध्यम वर्षाको गतिविधि जारी रहने बताइन्। उनका अनुसार आगामी दिनमा विशेषगरी पश्चिमी भूभागमा वर्षाको गतिविधि थप बढ्न सक्ने सम्भावना छ।
आज पनि वर्षाको सम्भावना
मौसमविद्का अनुसार आज काठमाडौं उपत्यकासहित देशका पहाडी तथा हिमाली भूभागका थोरै स्थानमा वर्षा हुने सम्भावना छ। तराईका केही स्थानमा पनि मध्यम वर्षा हुनसक्ने पूर्वानुमान गरिएको छ।
डा. पोखरेलका अनुसार भोलि असोज २० गते पहाडी भूभागका धेरै स्थानमा वर्षाको सम्भावना रहनेछ। पर्सि असोज २१ गते भने पश्चिमदेखि पूर्वसम्म नै वर्षाको गतिविधि बढ्न सक्ने उनको भनाइ छ।
असोज २१ गते सुदूरपश्चिम प्रदेशका एक–दुई स्थानमा भारी वर्षासमेत हुनसक्ने सम्भावना रहेको मौसमविद्ले बताएका छन्।
कर्णालीदेखि कोशीसम्म वर्षा
पछिल्लो २४ घण्टामा कर्णालीदेखि कोशी प्रदेशसम्मका विभिन्न भूभागमा वर्षा भएको छ। कोशी, मधेश, गण्डकी र लुम्बिनी प्रदेशका केही स्थानमा मध्यमदेखि भारी वर्षा भएको मौसम विज्ञान विभागले जनाएको छ।
पछिल्लो समयमा लुम्बिनी प्रदेशको बर्दियाको बर्गद्धा, अर्घाखाँचीको सिमलपानी र दाङको गढवा क्षेत्रमा समेत वर्षा भइरहेको छ।
मौसम विज्ञान विभागका अनुसार हाल कोशी, बागमती, गण्डकी र लुम्बिनी प्रदेशमा सामान्य बदली तथा मधेश, कर्णाली र सुदूरपश्चिम प्रदेशमा आंशिक बदली रहेको छ। केही स्थानमा तुवालोसमेत लागेको विभागले जनाएको छ।
महाशाखाको पूर्वानुमानअनुसार मधेश, कोशी, बागमती तथा गण्डकी प्रदेशका तराई भूभागका थोरै स्थानमा र लुम्बिनी तथा सुदूरपश्चिम प्रदेशका तराई भूभागका एक–दुई स्थानमा मध्यम वर्षा हुनसक्ने सम्भावना छ।
