काठमाडौँ । अविरल वर्षाका कारण पहिरो तथा बाढीले काठमाडौँ उपत्यका जोड्ने प्रमुख राजमार्गहरू अवरुद्ध भएपछि सडक खुलाउन निरन्तर प्रयास भइरहेको छ । पृथ्वीराजमार्गका विभिन्न स्थानमा पहिरो खसेका साथै केही ठाउँमा बाढीले सडक कटान र डाइभर्सन बगाएपछि यातायात सञ्चालन प्रभावित भएको हो ।
काठमाडौँ उपत्यका ट्राफिक प्रहरी कार्यालयका प्रवक्ता नरेशराज सुवेदीका अनुसार धादिङको गजुरी गाउँपालिका–२ चालिसे र गजुरी गाउँपालिका–५ बाङ्गेमोडमा खसेको पहिरो हटाउने काम भइरहेको छ । ठूलो मात्रामा लेदोसहित पहिरो खसेकाले सडक पूर्ण रूपमा खुलाउन केही समय लाग्ने प्रहरीले जनाएको छ ।
पृथ्वीराजमार्गअन्तर्गत कृष्णभिरमा खसेको पहिरो हटाइएपछि भने एकतर्फी रूपमा सवारीसाधन सञ्चालन गर्न सकिने अवस्था बनेको छ । तर, चालिसे र बाङ्गेमोडमा पहिरो पूर्ण रूपमा हटाउन बाँकी रहेकाले उक्त सडकखण्डमा नियमित यातायात सञ्चालन गर्न अझै कठिनाइ रहेको प्रवक्ता सुवेदीले जानकारी दिए ।
उनका अनुसार पहिरो हटाउने क्रममा थप वर्षा भए माथिबाट पुनः पहिरो खस्ने जोखिमसमेत रहेकाले यातायात सञ्चालनमा थप समस्या आउन सक्नेछ ।
यसैबीच, वर्षाका कारण काठमाडौँ उपत्यका जोड्ने पृथ्वीराजमार्ग, बिपी राजमार्ग र कान्ति राजमार्गसहित सात राष्ट्रिय राजमार्गमा यातायात प्रभावित भएको प्रहरीले जनाएको छ । विभिन्न स्थानमा पहिरो तथा बाढीका कारण सडक अवरुद्ध भएपछि सम्बन्धित निकायसँग समन्वय गरी सडक खुलाउने काम भइरहेको छ ।
कान्ति लोकपथअन्तर्गत ठिङ्गन तथा फर्पिङ–फाखेल खण्डमा पहिरो खसेपछि हटाउने काम भइरहेको छ । त्यस्तै, बिपी राजमार्गको माम्ती, पिप्ले, दाउन्ने–कालोपुल, चारसयबेँसी, कटुन्जे र चौकीडाँडालगायत स्थानमा पहिरो तथा बाढीले डाइभर्सन बगाएपछि यातायात सेवा प्रभावित भएको छ ।
बाढी तथा पहिरोका कारण सडक अवरुद्ध रहेकाले ट्राफिक प्रहरीले यात्रु तथा चालकलाई वैकल्पिक मार्ग प्रयोग गर्न र सडकको अवस्था बुझेर मात्र यात्रा गर्न आग्रह गरेको छ । लगातार वर्षा भइरहेका बेला पहाडी सडकमा जुनसुकै समयमा पहिरो खस्न सक्ने भएकाले अनावश्यक यात्रा नगर्नसमेत प्रहरीले अनुरोध गरेको छ ।
उता, काठमाडौँको दक्षिणकाली–सिस्नेरी सडकखण्डमा साना सवारीसाधन तथा टाटा सुमोलगायतका गाडी सञ्चालन भइरहेका छन् । ठूला सवारीसाधनलाई भने त्रिभुवन राजपथ हुँदै सञ्चालन गर्ने व्यवस्था मिलाइएको प्रवक्ता सुवेदीले बताए ।
ट्राफिक प्रहरीले दक्षिणकाली–सिस्नेरी सडकखण्ड र त्रिभुवन राजपथमा सवारीसाधनलाई निश्चित समयतालिका बनाएर आलोपालो सञ्चालन गर्ने व्यवस्था मिलाएको जनाएको छ । सडकको अवस्था, सवारीको चाप तथा मौसमलाई ध्यानमा राखेर यातायात व्यवस्थापन भइरहेको प्रहरीले जनाएको छ ।
लगातारको वर्षाका कारण उपत्यकाबाट बाहिरिने तथा उपत्यका प्रवेश गर्ने प्रमुख सडकमार्गमा यातायात प्रभावित हुँदा यात्रुहरू समस्यामा परेका छन् । विशेषगरी पृथ्वीराजमार्ग र बिपी राजमार्गमा पहिरो तथा बाढीका कारण लामो दूरीका सवारीसाधन बाटोमै रोकिएका छन् ।
प्रहरीले राजमार्गको अवस्था सामान्य नभएसम्म चालक तथा यात्रुलाई धैर्य गर्न, अवरुद्ध सडक जबर्जस्ती पार गर्ने प्रयास नगर्न तथा ट्राफिक प्रहरी र सम्बन्धित निकायबाट जारी सूचनाअनुसार मात्र यात्रा गर्न आग्रह गरेको छ ।
