काठमाडौं। नेकपा (एमाले)की सांसद एशुदाकुमारी बरालले सामाजिक सञ्जालमा ‘घण्टी’को फोटो राखेका व्यक्तिहरूबाटै आफूलाई बलात्कार गर्ने र ज्यान मार्ने धम्की आइरहेको बताएकी छन्। रसुवा बाढीपीडितको शीघ्र उद्धार गर्न माग गरेकै कारण आफू साइबर बुलिङको सिकार भएको उनको भनाइ छ।
शुक्रबार प्रतिनिधिसभाको बैठकमा बोल्दै सांसद बरालले महिलामाथि गालीगलौज र धम्की दिनेहरूलाई तत्काल कारबाही गर्न सरकारको ध्यानाकर्षण गराइन्। उनले बाढीपीडित महिला, सुत्केरी तथा अन्य पीडितले भोगिरहेको समस्याप्रति पनि सरकार गम्भीर बन्नुपर्ने बताइन्।
‘मलाई नै बलात्कार गरेर मारिदिन्छु भन्ने म्यासेज हजारौँ छन्,’ बरालले भनिन्, ‘महिलामाथि गाली गलौज गर्नेलाई कारबाही गर सरकार।’
सामाजिक सञ्जालमा ‘घण्टी’को फोटो राखेर गालीगलौज गर्ने गतिविधि भइरहेको भन्दै उनले त्यस्ता गतिविधि नियन्त्रण गर्न पनि सरकारसँग माग गरिन्।
बाढी प्रभावित क्षेत्रमा सडकमा नै महिला सुत्केरी हुनुपर्ने, खाना र ग्यासको अभावमा पीडितले जोखिमपूर्ण कदम चाल्नुपर्ने अवस्था रहेको उल्लेख गर्दै बरालले सरकारको नीति र उद्धारको कार्यशैलीप्रति प्रश्न उठाइन्। उनले पीडितको तत्काल उद्धार र राहतमा सरकारको ध्यान केन्द्रित हुनुपर्ने बताइन्।
