काठमाडौं। काठमाडौं उपत्यकामा खाना पकाउने एलपी ग्यासको अभाव चर्किएको छ। भोटेकोशी बाढी र त्यसपछि भएको सडक अवरोधका कारण आपूर्ति सहज हुन नसक्दा उपभोक्ता घण्टौँसम्म लाइनमा बस्न बाध्य छन्। बाढीअघि नै देखिएको ग्यास अभाव सडक अवरोधपछि थप जटिल बनेको हो।
सरकारले ग्यासको अभाव नरहेको र केही समयमै आपूर्ति सहज हुने बताउँदै आए पनि उपभोक्ता भने सिलिण्डरका लागि कुपन बोकेर डिपो र खुद्रा पसलमा धाइरहेका छन्। भीड व्यवस्थापनका लागि खुद्रा विक्रेताले नाम र नम्बर उल्लेख भएको कुपन वितरण गरी अर्को दिन ग्यास दिने व्यवस्था मिलाएका छन्।
कोटेश्वर क्षेत्रमा ग्यास बिक्री गर्दै आएका व्यवसायी शङ्करकुमार श्रेष्ठका अनुसार माग अत्यधिक भए पनि दैनिक करिब १ सय ५० सिलिण्डर मात्रै वितरण गर्न सकिएको छ। ‘हामीले दैनिक १५० वटा र अपाङ्गता भएका व्यक्तिहरूका लागि १० वटा गरी कुल १६० वटासम्म ग्यास सिलिण्डर वितरण गरिरहेका छौँ,’ उनले बताए।
जडिबुटीका राकेश विष्टले दुई–तीन दिनअघि कुपन लिए पनि ग्यास नपाएको बताए। सोमबार बिहान ८ बजेदेखि ग्यासको प्रतीक्षामा लाइनमा बसेका उनले काम छाडेर आउनुपरेको बताए। ‘काम छोडेर बिहान ८ बजेदेखि नै लाइनमा बसेको छु,’ उनले भने, ‘चुल्हो बाल्नै पर्ने बाध्यताले गर्दा कामको क्षति सहेर पनि यहाँ आउनुपरेको छ।’
उपभोक्ताका अनुसार बजारमा ग्यासको अभाव व्यापक छ र स्थानीय डिपोमा समेत पर्याप्त सिलिण्डर पुग्न सकेका छैनन्। ‘सम्बद्ध निकायले ग्यास पठाइरहेको बताए पनि डिपोहरूमा ग्यास आइपुगेको छैन,’ अर्का उपभोक्ताले भने।
रसुवामा आएको बाढीअघि नै सुरु भएको ग्यास अभाव सडक अवरोध र यातायात सञ्चालनमा आएको कठिनाइका कारण थप गहिरिएको हो। आपूर्ति सहज नहुँदा मागअनुसार सिलिण्डर नपाएपछि सर्वसाधारण दैनिक काम छाडेर ग्यासको खोजीमा भौँतारिन बाध्य छन्।
