चितवन । रसुवाको भोटेकोशी नदीमा आएको बाढीपछि त्रिशूली र नारायणी नदी हुँदै चितवनमा फेला परेका सनाखत हुन नसकेका १९९ शवको व्यवस्थापन गरिएको छ। भरतपुर महानगरपालिका–१ स्थित देवघाट जङ्गल क्षेत्रमा ती शवलाई आइतबार रातिसम्म व्यवस्थापन गरिएको हो।
जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार हालसम्म २७२ शव फेला परेका छन्। तीमध्ये १२ जनाको सनाखत भएको छ भने बाँकीमध्ये १९९ शवको व्यवस्थापन गरिएको हो।
सनाखत हुन नसकेका शवबाट डिएनए नमूना सुरक्षित राखेर व्यवस्थापन गरिएको प्रहरीले जनाएको छ। डिएनए परीक्षणका क्रममा बेपत्ता व्यक्तिका परिवारसँग नमुना मिलेमा पुनः पहिचान गरी शव हस्तान्तरण गर्न सकिने गरी व्यवस्थापन गरिएको छ। त्यसका लागि शव राखिएको स्थानमा आवश्यक सङ्केत चिह्नसमेत राखिएको छ।
फेला परेका २७२ शवमध्ये ११० पुरुष, ६२ महिला, सात बालक, छ बालिका र ८७ वटा मानव अवशेष रहेका छन्।
नदी किनारमा शव फेला पर्ने क्रम अझै जारी रहेकाले खोजी तथा व्यवस्थापनका लागि नेपाली सेना, नेपाल प्रहरी र सशस्त्र प्रहरीको संयुक्त टोली परिचालन गरिएको प्रहरीले जनाएको छ।
