काठमाडौं। वाग्मती प्रदेश सरकारले बाढीपहिरो प्रभावित रसुवा, नुवाकोट, धादिङ र चितवनका स्थानीय तहलाई राहत तथा उद्धारका लागि ३ करोड रुपैयाँ उपलब्ध गराउने निर्णय गरेको छ।
प्रदेशका मुख्यमन्त्री किरण थापा मगरका अनुसार रसुवाका चार स्थानीय तहलाई १ करोड, नुवाकोटलाई १ करोड तथा धादिङ र चितवनलाई ५०–५० लाख रुपैयाँ प्रदेश विपद् व्यवस्थापन कोषबाट उपलब्ध गराइनेछ।
मुख्यमन्त्री थापाले विपद्मा मृत्यु भएका व्यक्तिको अन्त्येष्टिका लागि प्रतिमृतक २५ हजार रुपैयाँ उपलब्ध गराउने निर्णयसमेत भएको बताए। उक्त रकम सम्बन्धित स्थानीय तहमार्फत मृतकका परिवारलाई दिइनेछ।
खाद्यान्न तथा अस्थायी आवासको समस्या भएका प्रभावित क्षेत्रमा प्रदेश सरकारले खर्च बेहोर्ने गरी राहत तथा आवासको व्यवस्था सुरु गरिएको उनले बताए। स्थानीय तहसँग समन्वय र सहकार्य गरी तत्कालीन राहत तथा उद्धारका कामलाई प्राथमिकता दिइएको उनको भनाइ छ।
‘रसुवाका चारवटा पालिकालाई १ करोड, नुवाकोटलाई १ करोड, धादिङलाई ५० लाख र चितवनलाई ५० लाख रुपैयाँ दिने निर्णय गरेका छौँ,’ मुख्यमन्त्री थापाले भने।
प्रदेश सरकारले प्रभावित क्षेत्रमा स्थानीय तहसँगको समन्वयमा राहत तथा पुनःस्थापनाका काम अघि बढाइरहेको जनाएको छ।
