काठमाडौं। भदौ १० गते रसुवाको भोटेकोशी नदीमा आएको बाढीमा परी विदेशी पर्यटकसहित ४ हजार ४७२ जना सम्पर्कविहीन रहेको नेपाल प्रहरीले जनाएको छ। हालसम्म प्रभावित जिल्लाबाट ७३५ जनाको शव फेला परेको छ।
केन्द्रीय प्रहरी प्रवक्ता अविनारायण काफ्लेका अनुसार सम्पर्कविहीन हुनेमा आठवटा जलविद्युत् आयोजनाका ९३३ कर्मचारी, २५ प्रहरी, १५ भन्सार कर्मचारी, चार अध्यागमन कर्मचारी, आठ बैंक शाखाका २६ कर्मचारी र लाङटाङ राष्ट्रिय निकुञ्जका तीन कर्मचारी छन्। सम्पर्कविहीनमध्ये ७४५ जना आन्तरिक तथा बाह्य पर्यटक रहेको उनले बताए।
प्रहरीका अनुसार रसुवाबाट ५६२, नुवाकोटबाट ११५, मकवानपुरबाट ६५ र सिन्धुपाल्चोकबाट २२५ जना सम्पर्कविहीन भएको विवरण प्राप्त भएको छ। काठमाडौं उपत्यकाबाट ४८१ र कोशी प्रदेशबाट १३८ जना सम्पर्कविहीन रहेको प्रवक्ता काफ्लेले बताए। गोसाइँकुण्ड गाउँपालिकाका उपाध्यक्षसहित केही जनप्रतिनिधिसमेत सम्पर्कविहीन रहेको विवरण आएको उनले जानकारी दिए।
‘हालसम्म ७ सय ३५ शव फेला परेको अवस्था छ। सम्पर्कविहीन करिब ४ हजार ४ सय ७२ जना छन्,’ काफ्लेले भने।
बाढीपहिरोपछि खोजी, उद्धार तथा राहतमा ७ हजार ८८९ सुरक्षाकर्मी परिचालन गरिएको प्रहरीले जनाएको छ। टिमुरे, स्याफ्रुबेँसी र रसुवागढी क्षेत्रमा पुरिएका घर तथा शवको खोजी जारी छ भने जलविद्युत् आयोजनाका सुरुङमा फसेकाको उद्धार प्रयाससमेत भइरहेको काफ्लेले बताए।
बाढीका कारण पृथ्वी राजमार्गअन्तर्गत धादिङको रोराङ गाउँपालिका–७ स्थित कृष्णभीरमा करिब सात मिटर सडक भासिएपछि राजमार्ग पूर्ण रूपमा अवरुद्ध भएको छ। गल्छीमा आइतबारको बाढीले थप चार घर बगाएको र आठ घर जोखिममा परेको प्रहरीले जनाएको छ।
पहिचान हुन नसकेका केही शवको अन्तर्राष्ट्रिय मापदण्डअनुसार अस्थायी व्यवस्थापन गरिएको पनि प्रहरीले जनाएको छ।
