काठमाडौं। नेकपा एमालेका महासचिव शंकर पोखरेलले रसुवाको बाढीमा ज्यान गुमाएकाको शव पहिचान नगरी जमिनमुनि व्यवस्थापन गर्ने सरकारको नीति गलत भएको बताएका छन्। डीएनए परीक्षणपछि पुनः उत्खनन गर्ने गरी शव व्यवस्थापन गरिएको भए पनि त्यसबाट पीडित परिवार सन्तुष्ट हुन नसकेको उनले बताए।
आइतबार पार्टी केन्द्रीय कार्यालयमा आयोजित कार्यक्रममा पोखरेलले शव पहिचान तथा व्यवस्थापनमा सरकारको कमजोरी देखिएको बताए। पीडित परिवारबाट शव व्यवस्थापनप्रति असन्तुष्टि व्यक्त भइरहेकाले सरकारले यस विषयमा गम्भीर ध्यान दिनुपर्ने उनको भनाइ छ।
‘शव पहिचानको सन्दर्भमा सरकारले जे नीति बनायो, यो अत्यन्त बेठीक भएको छ,’ पोखरेलले भने, ‘पीडितहरूको दृष्टिकोणबाट हेर्ने हो भने उनीहरूलाई चित्त बुझेको अवस्था छैन।’
सरकारले डीएनए परीक्षणपछि शव पुनः उत्खनन गर्न सकिने गरी व्यवस्थापन गरेको भए पनि तत्काल आफन्तलाई शव पहिचान तथा अन्त्येष्टि गर्न पाउने अवस्थालाई प्राथमिकता दिनुपर्ने पोखरेलले बताए।
यसैबीच एमालेले बाढीपहिरो प्रभावित क्षेत्रमा राहत तथा उद्धारका लागि पार्टी पंक्तिबाट सहयोग संकलन गर्ने भएको छ। त्यसका लागि प्रदेश इन्चार्ज र अध्यक्षहरूलाई निर्देशन दिइएको पोखरेलले जानकारी दिए। पार्टीका तर्फबाट संकलित सहयोग केन्द्रीय राहत कोषमा जम्मा गरिने उनले बताए।
प्रभावित जिल्लामा पार्टी केन्द्रसँग समन्वय गर्न फोकल पर्सन तोक्ने र उनीहरूले प्रभावित क्षेत्रको सूचना संकलन गरी राहत तथा उद्धारका काममा समन्वय गर्ने व्यवस्था मिलाइने पोखरेलले बताए।
