काठमाडौँ । त्रिभुवन विश्वविद्यालयले रसुवासहित बाढी प्रभावित जिल्लाका नागरिकको राहत तथा पुनर्स्थापनाका लागि आफ्ना शिक्षक तथा कर्मचारीबाट रकम संकलन गरी ‘प्रधानमन्त्री दैवी प्रकोप उद्धार कोष’मा जम्मा गर्ने निर्णय गरेको छ।
गत भदौ १० गते तिब्बततर्फबाट आएको भीषण बाढीले रसुवा, नुवाकोट, धादिङ, गोरखा र चितवनमा ठूलो जनधनको क्षति पुर्याएपछि विश्वविद्यालयले राहतमा सहयोग गर्ने निर्णय गरेको हो।
शुक्रबार बसेको त्रिभुवन विश्वविद्यालय कार्यकारी परिषद्को बैठकले विश्वविद्यालयमा कार्यरत जनशक्तिको पारिश्रमिकबाट निश्चित दिनको रकम कट्टा गरी राहत कोषमा जम्मा गर्ने निर्णय गरेको निमित्त रजिष्ट्रार प्रा.डा. महानन्द चालिसेद्वारा जारी सूचनामा उल्लेख छ।
निर्णयअनुसार भदौ महिनाको पारिश्रमिक भुक्तानी गर्दा पद तथा तहअनुसार फरक–फरक दिनको सुरु तलब स्केल कट्टा गरिनेछ। कुलपतिबाट नियुक्त पदाधिकारीको एक महिनाको तलब कट्टा हुनेछ।
त्यस्तै, प्राध्यापक, प्रशासक, सहप्राध्यापक, सहप्रशासक वा सो सरहका शिक्षक–कर्मचारीको १० दिन, उपप्राध्यापक, उपप्रशासक, शाखा अधिकृत तथा प्रशिक्षकको ७ दिन, मुख्य कार्यालय सहायक र कार्यालय सहायकको ५ दिन तथा श्रेणीविहीन कर्मचारीको २ दिन बराबरको सुरु तलब स्केल कट्टा गरिने विश्वविद्यालयले जनाएको छ।
यसरी कट्टा भएको रकम आर्थिक प्रशासन महाशाखामार्फत ‘प्रधानमन्त्री दैवी प्रकोप उद्धार कोष’को खातामा जम्मा गरिने व्यवस्था मिलाइएको छ।
