काठमाडौं । शिक्षा तथा खेलकुदमन्त्री सस्मित पोखरेलले आगामी चार वर्षभित्र विश्वविद्यालयमा हुने राजनीतिक हस्तक्षेप र भागबण्डाको अभ्यास अन्त्य गर्ने बताएका छन् ।
बिहीबार त्रिभुवन विश्वविद्यालयको ६७ औँ वार्षिक दिवसका अवसरमा आयोजित झण्डोत्तोलन समारोहलाई सम्बोधन गर्दै विश्वविद्यालय सभाका उपाध्यक्षसमेत रहेका पोखरेलले विश्वविद्यालयको नेतृत्व र प्रशासनिक संरचना अब राजनीतिक भागबण्डाका आधारमा नभई योग्यता (मेरिटोक्रेसी) का आधारमा निर्माण गरिने बताए ।
उनले नियुक्ति, सरुवा, बढुवा लगायतका प्रशासनिक निर्णयमा राजनीतिक दबाबको अन्त्य गरिने जिकिर गर्दै विश्वविद्यालयभित्र कुनै पनि प्रकारको हस्तक्षेप स्वीकार्य नहुने स्पष्ट पारे । ‘अब विश्वविद्यालयका सबै निर्णय मेरिटोक्रेसीका आधारमा हुन्छन् । राजनीतिक दबाबका आधारमा कसैको नियुक्ति, सरुवा वा बढुवा गरिने छैन,’ उनले भने ।
पोखरेलले कुनै पनि प्रकारको राजनीतिक दबाब परे तत्काल शिक्षामन्त्रालयलाई जानकारी गराउन आग्रह गर्दै आफ्नो दल वा अन्य कुनै पनि दलबाट अनुचित हस्तक्षेप भए सरकारले त्यसको प्रतिरोध गर्ने बताए ।
विश्वविद्यालयको प्राज्ञिक वातावरण सुधार र स्वायत्तता संरक्षणप्रति सरकार प्रतिबद्ध रहेको उल्लेख गर्दै उनले विश्वविद्यालय सुधारका लागि राजनीतिक स्वार्थभन्दा माथि उठेर काम गर्ने प्रतिबद्धता पनि दोहोर्याए ।
