काठमाडौं । प्रहरीको कुटपिट तथा धरपकडमा घाइते भएका जेन जेड अभियन्ता माजिद अन्सारीलाई थप उपचारका लागि महाराजगञ्जस्थित त्रिवि शिक्षण अस्पताल लगिएको छ।
जेन जेड अभियन्ता तनुजा पाण्डेले सामाजिक सञ्जालमार्फत् दिएको जानकारीअनुसार प्रहरीको कुटपिटका क्रममा माजिदको टाउको र अनुहारमा बुटले प्रहार गरिएको थियो। त्यसका कारण उनको अनुहारसहित शरीरको माथिल्लो भागमा गम्भीर चोट लागेको बताइएको छ।
घटनापछि माजिदलाई प्रारम्भिक उपचारका लागि कीर्तिपुर अस्पताल लगिएको थियो। त्यहाँ भिडियो एक्स–रेसहित आवश्यक स्वास्थ्य परीक्षण गरिएपछि थप उपचारका लागि उनलाई महाराजगञ्जस्थित त्रिवि शिक्षण अस्पताल रिफर गरिएको हो।
शनिबार दिउँसो कीर्तिपुरस्थित राधास्वामी होल्डिङ सेन्टरमा रहेका सुकुम्बासीहरूको अवस्था बुझ्न पुगेका जेन जेड अभियन्ताहरू माजिद अन्सारी, मोनिका निरौला, रीया बानियाँ र सरिस्मा थापामाथि प्रहरीले कुटपिट तथा धरपकड गरेको जनाइएको छ।
