काठमाडौँ । साताको अन्तिम कारोबार दिन शुक्रबार नेपाल स्टक एक्सचेन्ज (नेप्से) परिसूचकमा सुधार देखिएको छ।
लगातार चार कारोबार दिन ओरालो लागेको बजारले यस दिन भने सामान्य वृद्धि दर्ता गर्दै गिरावटको शृङ्खला रोकेको हो।
कारोबार अवधिको अन्त्यसम्म नेप्से परिसूचक अघिल्लो दिनको तुलनामा १ दशमलव ५४ अंकले बढेर २ हजार ७ सय ८८ विन्दुमा पुगेको छ। यसअघि लगातार चार दिन बजारमा दबाब देखिएको थियो।
कारोबार रकममा पनि केही सुधार आएको छ। अघिल्लो दिन ५ अर्ब ९ करोड रुपैयाँ बराबरको सेयर किनबेच भएकोमा शुक्रबार ५ अर्ब २७ करोड रुपैयाँको कारोबार भएको छ।
यस दिन बजारमा सूचीकृत तीन कम्पनीको सेयर मूल्य करिब १५ प्रतिशतसम्म बढेको देखिएको छ, जसले समग्र बजारमा सकारात्मक संकेत दिएको विश्लेषण गरिएको छ।
