बारा, १९ कात्तिक । गाईगोठभित्र लुकाएर राखेको ३४ किलो गाँजा प्याक गरिरहेको अवस्थामा प्रहरीले दुई व्यक्तिलाई पक्राउ गरेको छ ।
सिम्रौनगढ नगरपालिका-४ गंगानगर टोलमा बस्ने हिरा महतोको गाईगोठ भित्र शनिबार बिहान ९:३० बजे गाँजा प्याक गरिरहेको अवस्थामा दुई व्यक्तिलाई प्रहरीले नियन्त्रणमा लिएको हो ।
पक्राउ पर्नेमा सिम्रौनगढ नगरपालिका-४ गंगानगर बस्ने अन्दाजी २५ वर्षका दिपेन्द्र भन्ने जितेन्द्र कुशवाहा र सोही स्थानका अन्दाजी ३५ वर्षीय सरोज प्रसाद यादव रहेको जिल्ला प्रहरी कार्यालय बाराका प्रवक्ता प्रहरी नायव उपरीक्षक प्रकाश सापकोटाले केटिएम दैनिकलाई बताए ।
विषेश सूचनाको आधारमा ईलाका प्रहरी कार्यालय सिम्रौनगढबाट खटिएको प्रहरी टोलीले उनीहरूलाई नियन्त्रणमा लिएको हो । पाँच पोकामा रहेको गाँजाको तौल ३४ किलो रहेको प्रहरीले जनाएको छ ।
पक्राउ परेका व्यक्तिउपर आवश्यक कानूनी प्रकृया अगाडी बढाईएको डिएसपी सापकोटाले बताए ।
