भक्तपुर, १ असोज । भक्तपुरको सूर्यविनायक-२ बालकोटमा रहको महेन्द्र शान्ति माध्यमिक विद्यालयको तीन तल्ले भवन उद्घाटन गरिएको छ ।
‘नेपाल-भारत विकास सहकार्य’ अन्तर्गत भारत सरकारको एक करोड १३ लाख रुपैयाँको आर्थिक सहयोगमा निर्माण गरिएको विद्यालय भवनको हिजो उद्घाटन गरिएको हो ।
भक्तपुर क्षेत्र नं २ बाट प्रतिनिधि सभाका सांसद दुर्लभ थापा क्षेत्री, जिल्ला समन्वय समितिका प्रमुख ईश्वर बहादुर थापा, सूर्यविनायक नगरपालिकाका उप-प्रमुख सरिता तिम्सिना (भट्टराई) र काठमाडौँस्थित भारतीय राजदूतावासका प्रथम सचिव श्री अविनाश कुमार सिंहले उक्त भवनको संयुक्त रूपमा उद्घाटन गरेका हुन् ।
उद्घाटन कार्यक्रममा विभिन्न राजनीतिक दलका प्रतिनिधि, सरकारी अधिकारी, समाजसेवी, विद्यालय व्यवस्थापनका प्रतिनिधि, शिक्षक/शिक्षिका, अभिभावक तथा विद्यार्थीहरूको पनि उपस्थिति रहेको थियो ।
भारत सरकार र नेपाल सरकारबीच भएको सम्झौता अन्तर्गत यो परियोजनालाई उच्च प्रभाव सामुदायिक विकास परियोजनाको रूपमा अघि बढाइएको थियो । जिल्ला समन्वय समिति, भक्तपुरमार्फत यो परियोजनाको कार्यान्वयन गरिएको थियो ।
सन् १९५२ मा प्राथमिक विद्यालयको रूपमा स्थापना भएको यस विद्यालय सन् १९९५ मा माध्यमिक तहमा स्तरोन्नति भएको थियो । यो विद्यालय भक्तपुर जिल्लाकै पुरानो विद्यालय मध्येको एक हो ।
नर्सरीदेखि कक्षा १२ सम्म अध्यापन हुने यस विद्यालयमा कुल विद्यार्थी सङ्ख्या करिब ८०० जना छन् जसमध्ये ४५ प्रतिशत छात्राहरू रहेका छन् ।
