रसुवा, ३० भाद्र । चीनबाट नेपालमा विक्री गर्न ल्याइँदै गरेका दुई वटा ईभी दुर्घटनामा परेका छन् ।
शुक्रवार टिमुरे बाट काठमाडौँ तर्फ आउँदै गरेका अन टेस्ट दुई वटा बीवाईडी दुर्घटनामा परेको रसुवा प्रहरीले जनाएको छ ।
शुक्रवार दिउँसो गोसाईंकुण्ड गाउँपालिका-५ सानो भार्खुमा टिमुरेबाट काठमाडौँ तर्फ आउँदै गरेको बीएसी ५७०९ नम्बरको स्कारपियो जिपले सोही दिशाबाट आउँदै गरेको बीवाईडी कम्पनीको अन टेस्ट कारलाई ठक्कर दिएको थियो ।
स्कारपियोको ठक्करबाट उक्त ईभीको अगाडिको हेड लाइट, बम्पर, बडि, बम्पर ब्राकेट, रनिङबोर्ड र फेन्डर समेत क्षति भएको जिल्ला प्रहरी कार्यालय रसुवाका प्रमुख प्रहरी नायव उपरीक्षक केशव भट्टराईले जानकारी दिए ।
दुर्घटनामा परेको स्कारपियोको पछाडि भागमा सामान्य क्षति भएको उनले बताए । उक्त दुर्घटनामा मानवीय क्षति भएको छैन ।
त्यस्तै जिल्लाको कालिका गाउँपालिका-२ चिउरी बोटमा टिमुरेबाट काठमाडौँ तर्फ आउँदै गरेको अन टेस्ट बीवाईडी ईलेक्टिक कार र बेत्रावतीबाट धुन्चे तर्फ आउँदै गरेको ना ७ ख १९ नं. को डिब्बा गाडी ठक्कर खाएका हुन् ।
डिब्बा गाडीले साइड दिने क्रममा उक्त ईलेक्टिक कारको दाहिने साइडको लुकिङ ग्लास स्क्र्याच भएको रसुवा प्रहरीले जनाएको छ ।
