भक्तपुर, ८ भाद्र । भक्तपुरको भक्तपुर नगरपालिका-९ चोखामरु चोकमा हिजो (शुक्रबार) दिउँसो टिपरको ठक्करबाट घाइते भएका साइकलयात्रीको निधन भएको छ ।
शुक्रबार दिउँसो १२:५५ बजेको समयमा खरिपाटीबाट भाने चोक तर्फ जाँदै गरेको बाग्मती ४ ख. ४९३१ नं. को टिपरले साईकललाई ठक्कर दिएको थियो ।
उक्त दुर्घटनामा साईकल चालक भक्तपुर नगरपालिका-८ लिवाली बस्ने वर्ष ६५ को आसनारा कोजु गम्भिर घाईते भएका थिए ।
घाइते कोजुलाई तत्काल उपचारको लागि ख्वपा अस्पताल च्यामासिंह, भक्तपुर लगेतापनि चिकित्सकले घाइतेको बाटोमै निधन भएको पुष्टि गरे ।
घटनास्थलमा प्रहरी वृत जगाती भक्तपुरबाट अनुसन्धान अधिकृत सहितको प्रहरीले पुगेर प्रारम्भिक अनुसन्धान पश्चात दुबै सवारी साधन र टिपर चालक जिल्ला सिन्धुपाल्चोक मेलम्ची नगरपालिका-९ घर भई हाल भक्तपुर भानेचोक बस्ने वर्ष ३३ को अमिर तामाङलाई नियन्त्रणमा लिएको छ।
घटनाको सम्बन्धमा थप अनुसन्धान कार्य भई रहेको जिल्ला प्रहरी परिसर भक्तपुरले जारी गरेको सूचनामा उल्लेख छ ।
