
-मोरङको सुनवर्षी नगरपालिका-७ मा अपाङ्गता भएकी १७ वर्षीया किशोरी बलात्कृत भइन् । शारीरिक रूपमा अपाङ्गता रहेकी उनी बोल्न सक्दिनन् । उनी राम्ररी हिँडडुल गर्न पनि सक्दिनन् । घरमा कोही नभएको मौका छोपेर सुनवर्षी-७ का २२ वर्षीय सुरेन्द्र ऋषिदेवले जबरजस्ती किशोरीलाई भान्सा कोठामा लगेर साँझ ५:३० बजेतिर बलात्कार गरे ।
ती किशोरीमाथि जबरजस्ती करणी भइरहँदा पनि उनी चिच्याउन सकिनन्, प्रतिकार गर्न सकिनन् । तर स्थानीयले उनीमाथि जबरजस्ती गरिरहेको देखेपछि गाउँमा होहल्ला गरे । होहल्ला हुन थालेपछि सुरेन्द्र फरार भए । इलाका प्रहरी कार्यालय रङ्गेलीका प्रहरी निरीक्षक अनमोल खड्का नेतृत्वको टोलीले भाग्दै गरेको अवस्थामा सुरेन्द्रलाई पक्राउ गर्यो ।
…..
-मोरङकै सुन्दरहरैँचा नगरपालिका-८ मा हजुरबुबा उमेरका एक जनाले १२ वर्षीया बालिका बलात्कृत भइन् । १९ माघमा स्थानीय ५३ वर्षीय रामदेव चौधरीले ललाईफकाई घरनजिकको बाँसघारीमा लगेर बालिकालाई बलात्कार गरे । बलात्कारपछि पीडित बालिकाको स्वास्थ्यअवस्था बिग्रियो । रक्तश्राव नरोकिएपछि उनले आफन्तलाई सुनाइन् ।
सोही दिन प्रहरीले उनलाई पक्राउ गरेर अनुसन्धान थाल्यो । प्रहरीले बलात्कार पीडित बालिकालाई उपचार र स्वास्थ्य परीक्षणका लागि बिपी कोइराला स्वास्थ्य विज्ञान प्रतिष्ठान धरान पठायो र पीडकको स्वास्थ्य परीक्षण पनि धरानमै गर्यो । अहिले उनी इलाका प्रहरी कार्यालय बेलबारीको हिरासतमा छन् ।
…..
-मोरङकै कानेपोखरी गाउँपालिका-५ मा ११ बर्से बालकले ६ वर्षीया बालिकामाथि बलात्कार गरे । शनिबार (माघ २९ गते) दिउँसो खेल्ने क्रममा बालकले छिमेकीको घरमा लगेर बालिकालाई बलात्कार गरेपछि उनलाई प्रहरीले पक्राउ गरी अनुसन्धान गरिरहेको छ । बलात्कारबाट पीडित भनिएकी बालिकाको यौनाङ्गमा चोटपटक पनि लागेको छ । बालिकाले अभिभावकलाई सुनाएपछि घटना बाहिर आएको हो । अहिले बलात्कार पीडित बालिका तथा पीडक बालकलाई उपचार र स्वास्थ्य परीक्षणका लागि विराटनगरको कोसी अस्पताल ल्याइएको छ ।
…..
-बाराको आदर्श कोतवल गाउँपालिका-७ मा नौ वर्षीया बालिका रूपमालाकुमारी साहको बलात्कारपछि हत्या भयो । पुस २५ मा बाख्रा चराउन गएको बेला स्थानीय सन्तोष साह कानुले बलात्कारपछि उनको हत्या भयो । हत्या आरोपमा प्रहरीले आदर्शकोतवाल गाउँपालिका-८ घर भएका २० वर्षीय कानु र उनकी आमा ४० वर्षीया शान्तिदेवीलाई पक्राउ गर्यो ।
आफूसँगै बाख्रा चराउन गएकाहरुले खानेपानी ल्याउन आग्रह गरेपछि रूपमाला कुखुरा फर्मतर्फ पानी लिन गएकी थिइन् । फर्ममा एक्लै बसिरहेका सन्तोषले पानी लिएर फर्किँदा कुरेर फर्मभित्र बलात्कारपछि बालिकाको घाँटी कसेर तथा टाउकोमा फरुवाले हिर्काएर हत्या गरेका थिए । आरोपी सन्तोषकी आमाले कुखुरा फर्मको दशी, प्रमाण लुकाएको आरोपमा प्रहरीले पक्राउ गरेको थियो ।
यी तीन बालिकामाथि हुने बलात्कारका प्रतिनिधिमुलक घटनाहरू हुन्, जसको ग्राफ निरन्तर उकालो लागिरहेको छ । नेपालमा दैनिक ६ जना बलात्कृत हुन्छन् भन्दा धेरैले नपत्याउलान् । जसले पत्याउँछन्, उनीहरूको मनमा चिसो पस्छ, मुटु काँप्छ । यही नै सत्य हो । केटिएम दैनिकले प्राप्त गरेको नेपाल प्रहरी मुख्यालयको तथ्याङ्कले मुलुकभरि दैनिक ६ जना बलात्कारको सिकार भइरहेको देखाएको छ । अनि त्यसमध्ये सबैभन्दा बढी बालिकाहरू रहेको प्रहरीको तथ्याङ्कमा उल्लेख छ ।
सो तथ्याङ्कले नेपालमा पछिल्ला वर्षहरूमा बलात्कारजस्ता जघन्य अपराधहरू बढ्दै गएको देखाउँछ । विगत चार आर्थिक वर्षको तथ्याङ्क विश्लेषण गर्ने हो भने यो अवधिमा ११ देखि १६ वर्ष उमेर समूहका तीन हजार तीन सय दुई जना बालिकाहरूमाथि जबरजस्ती करणी भएको छ ।
आर्थिक वर्ष २०७४-७५ मा एक हजार चार सय ८० घटना प्रहरीको दर्ता भएकोमा ०७५-७६ मा बढेर दुई हजार दुई सय ३० पुगेका छन् । २०७६-७७ मा अघिल्लो वर्षको तुलनामा अलिक कम अर्थात् दुई हजार एक सय ४५ घटना दर्ता भएकोमा पछिल्लो आवमा भने उक्त सङ्ख्या बढेर दुई हजार पाँच सय ३२ पुगेको छ ।
चालु आर्थिक वर्षको सातै प्रदेशहरूको तथ्याङ्क प्राप्त हुन नसकेको भएतापनि हामीले पाएको प्रदेश १ र मधेश प्रदेशको तथ्याङ्क हेर्दा जवरजस्ती करणी अपराधका घटनाहरू बढ्दै गएका छन् । बलात्कारपछि हत्या गरिएको निर्मला पन्त र भागिरथी भट्टको बारेमा त हामी सबैले सुनकै छौँ ।
विगत तीन वर्षमा बलात्कार गरेर १६ जनाको हत्यासमेत गरिएको प्रहरीको तथ्याङ्कमा उल्लेख छ । त्यसमध्ये १३ जना त कलिलो उमेरका बालिकाहरू नै छन् । जिल्लागत विवरण हेर्दा हिमाली जिल्लाहरूमा यस्ता घटना कम छन् भने सङ्घीय राजधानी काठमालगायत विकसित जिल्लाहरूमा सङ्ख्या बढ्दो छ ।
मानिस शिक्षित भएपछि यी घटना कम हुँदै जानुपर्ने हो । तर तथ्याङ्कले भने यस्ता घृणित अपराध भने बढ्दै गएको देखाउँछ । सबैभन्दा कम जनसङ्ख्या भएको मनाङ जिल्लामा पछिल्लो चार वर्षको अवधिमा एउटामात्र बलात्कारको घटना प्रहरीमा दर्ता हुन पुग्यो । अर्को हिमाली जिल्ला मुस्ताङमा भने वार्षिक एक वा बढीमा दुईवटा घटनाहरू प्रहरीकोमा पुग्ने गरेको छ । यो चार वर्षको अवधिमा त्यहाँ बलात्कार ६ वटा घटनामा प्रहरीसमक्ष पुगेको तथ्याङ्कमा उल्लेख छ ।
७७ वटै जिल्लाका मानिसहरूको बसोबास रहेको काठमाडौँमा चार वर्षको अवधिमा सात सय चार करणीका केस प्रहरीकोमा आइपुग्यो । काठमाडौँ उपत्यकाभित्रका तीन जिल्लामा यो अवधिमा १० वर्षभन्दा कम उमेरका एक सय २१ बालिकाहरू बलात्कृत बने । ११ देखि १६ वर्ष उमेर समूहका बालिकाहरू सबैभन्दा बढी पीडित हुनुपुगे । उपत्यकामा यो उमेर समूहका तीन सय ३० बालिकाहरू बलात्कारको पीडाबाट गुज्रिरहेका छन् ।

यो चार वर्षको अवधिमा नेपालभर आठ हजार तीन सय ३१ वटा महिलामाथि (बालिसकासमेत) जवरजस्ती करणी गरिएका घटनाहरू प्रहरीसमक्ष पुगेका छन् । तीमध्ये माथि उल्लेख गरिएजस्तै सबैभन्दा बढी पीडित उमेर समूह भनेको ११ देखि १६ वर्ष नै हो ।
उमेर समूहअनुसार हेर्ने हो भने १० वर्षमुनिका एक हजार एक सय ३७ बालिकाहरू, ११ देखि १६ वर्ष उमेर समूहका तीन हजार तीन सय दुई जना बालिकाहरू, १७ देखि १८ वर्षका एक हजार ४२ किशोरीहरू १९ देखि २५ वर्षका १ हजार चार सय १७ युवतीहरू, २६ देखि ३५ वर्ष उमेर समूहका नौ सय आठ महिलाहरू, ३६ देखि ४५ वर्ष उमेर समूहका दुई सय २८ महिलाहरू र ४६ वर्षभन्दा माथिका दुई सय ९७ जना महिलाहरू बलात्कारको सिकार बनेका छन् ।
प्रहरी तथ्याङ्कमा नै सबैभन्दा बालिकाहरू पीडित बनेको उल्लेख छ । विगत चार वर्षको अवधिमा नेपालभर आठ हजार तीन सय ३१ वटा बलात्कारका केसहरू प्रहरीसमक्ष आइपुगेकोमा १० वर्षमुनिका एक हजार एक सय ३७ र ११ देखि १६ वर्ष उमेर समूहका तीन हजार तीन सय दुई जना बालिकाहरू बलात्कृत बनेका छन् । यसको अर्थ ‘यौन पिशाच’ले बालिकामाथि नै टार्गेट गर्ने गरेका छन् ।

विशेष गरी बालिकाहरूलाई फकाउन सजिलो हुने प्रलोभनमा पार्न सकिने, करकाप गर्दा मान्न सक्ने, धम्क्याउन सकिने, प्रतिवाद गर्न नसक्ने भएका कारण कमजोर आँकेर बालिकालाई ‘यौन पिशाच’ले आफ्नो सिकार बनाउने गरेको मनोविद् गोपाल ढकालले बताउँछन् । त्यसबाहेक पिडोफेलियाजस्तो यौनसम्बन्धी रोगीले पनि बालिकासँग सम्पर्क राख्दा यो रोग निको हुने भन्ने भ्रमका कारण बालिकाहरू टार्गेट गर्ने उनको भनाइ छ ।
'बालिकालाई फकाउन, बहकाउन, करकापमा पार्न सकिने भएका कारण उनीहरू बलात्कारको सिकार हुन्छन्', ढकालले भने, ‘त्यसबाहेक बालिकासँग सम्पर्क राख्दा आनन्द आउने, यौनसम्बन्धी रोग निको हुने भ्रम पलाउने भएका कारण पनि उनीहरूमाथि बलात्कारका घटना बढ्ने गरेको छ ।'
त्यसबाहेक किशोरावस्था पुग्नै लागेको समयमा उनीहरूमा यौनका बारेमा जिज्ञासा राख्ने, विपरीत लिङ्गप्रति आकर्षित हुने हुँदा त्यसको फाइदा यौन पिशाचले उठाउन सक्ने देखिएको छ ।‘ एकदमै परिपक्व भएका पुरुषले यौन चाहना पूरा गर्न किशोरीसँग सम्बन्ध राख्छ भने त्यसलाई हामी पिडोफेलिया भन्छौँ । योचाहिँ यौन विचलनको रोग हो, त्यस्ता रोगीले आफ्नो यौन चाहना परिपूर्ति गर्नका लागि सानो उमेरका बालिका बलात्कार गर्ने क्रम बढेको हो ।'
१६ वर्षमुनिका बालिकाहरूको प्रदेशगत तथ्याङ्क केलाउने हो भने प्रदेश १ को अवस्था निकै कहालीलाग्दो छ । प्रदेश १ मा एक हजार ७७ बालिकाहरू पीडित भएका छन् । त्यस्तै, मधेश प्रदेशमा ६ सय १६ जना बागमती प्रदेशमा (उपत्यकाबाहेक) पाँच सय ३९ जना, गण्डकी प्रदेशमा चार सय १२ जना लुम्बिनी प्रदेशमा सात सय ७१ जना कर्णाली प्रदेशमा दुई सय ४४ जना, सुदूरपश्चिम प्रदेशमा तीन सय २४ जना र उपत्यकामा चार सय ५५ जना पीडित बनेका हुन् ।
प्रहरी भन्छ : पीडितमा सचेतना बढ्दा बलात्कारका घटना बढे
पहिले घटना दबाएर राखिने भए पनि अहिले अधिकांशले कानुनी उपचार खोज्ने भएका कारण बलात्कारको ग्राफ उकालो लागेको बताउँदै उनी भन्छन्, ‘जनता शिक्षित भइसके, पीडित पनि घटनाबारे खुल्न थालेका छन् । सामाजिक सञ्जाल अपराधको थलो बनेको छ तर सदुपयोग गर्नेहरूले त्यहाँबाट पनि न्याय पाउने आफ्नो अधिकारका बारेमा जानकारी पाइरहेका छन् ।'

नेपाल प्रहरीका केन्द्रीय प्रवक्ता एसएसपी विष्णुकुमार केसी पीडितमा सचेतना बढेसँगै बलात्कारका घटनामा वृद्धि आएको बताउँछन् । ‘बलात्कारसम्बन्धी अपराध दैनिकजसो बढेको पाइएको छ,’ उनी भन्छन्, ‘पहिले हिंसा भए पनि प्रहरीसम्म कमै उजुरी पुग्थे । पीडित खुल्ने सम्भावना कमै हुन्थ्यो । तर अहिले जनतामा आएको चेतना र प्रहरी सक्रियताका कारण उजुरी बढेको छ ।'
पहिले घटना दबाएर राखिने भए पनि अहिले अधिकांशले कानुनी उपचार खोज्ने भएका कारण बलात्कारको ग्राफ उकालो लागेको बताउँदै उनी भन्छन्, ‘जनता शिक्षित भइसके, पीडित पनि घटनाबारे खुल्न थालेका छन् । सामाजिक सञ्जाल अपराधको थलो बनेको छ तर सदुपयोग गर्नेहरूले त्यहाँबाट पनि न्याय पाउने आफ्नो अधिकारका बारेमा जानकारी पाइरहेका छन् ।'
त्यस्ता घटनामा संलग्न कानुनी कारबाहीमा परेका कारण अन्य आपराधिक सोच भएका व्यक्तिको मनोबल घटिरहेको उनको भनाइ छ । ‘अन्य देशको तुलनामा नेपालको कानुन कडा छ,’ उनी भन्छन्, ‘हो, हाम्रो संविधानमा फाँसीको व्यवस्था छैन । तर कानुनी कारबाहीमा ल्याउन नेपाल प्रहरीले प्रभावकारी काम गरिरहेको छ । यसकारण घटना सतहमा आउँदै छन् ।'