काठमाडौँ । सङ्खुवासभा पाँचखपन नगरपालिका-६ मा रहेको वाना उच्च माध्यमिक विद्यालयका व्यवस्थापन समिति (विव्यस) अध्यक्ष बालयौन दुरुपयोगमा पक्राउ परेका छन् ।
स्थानीय निजी विद्यालयमा अध्ययनरत आठ बर्सिया बालिकामाथि करणीको मनसायले बालयौन दुरुपयोग गरेको भन्दै विव्यस अध्यक्ष गोविन्द श्रेष्ठलाई पक्राउ गरिएको हो ।
जिल्ला प्रहरी कार्यालय संखुवासभाका प्रमुख प्रहरी नायव उपरीक्षक विरेन्द्र पोद्दारले अदालतबाट पक्राउ पूर्जी लिएर श्रेष्ठलाई पक्राउ गरिएको पुष्टि गरे । उनले भने, ‘उहाँलाई हामीले नियन्त्रणमा लिएका छौं । अब अनुसन्धानपछि अदालतमा पेश गर्छौं ।’
घटना गत जेठको भएता पनि केहीदिन अघि मात्र सार्वजनिक भएको हो ।
उक्त घटनामा पीडित परिवारलाई नगद रकम दिएर मिलापत्र गरिएको स्थानीयले दाबी गरेतापनि स्वतन्त्र पुष्टि भने हुन सकेको छैन ।
शुक्रबार विव्यस अध्यक्ष श्रेष्ठसँग केटिएम दैनिकले टेलिफोन सम्पर्क गर्दा उनले राजनीतिक प्रतिशोधको कारण आफूमाथि आरोप लगाइएको बताएका थिए ।
कसैले करणीका आशयले बालबालिकालाई अस्वाभाविक रूपमा एकान्तमा लगेमा, यौन सम्बन्धी निजको अङ्ग छोएमा वा समातेमा, यौन सम्बन्धी आफ्नो अङ्ग निजलाई छुन वा समाउन लगाएमा वा निजसँग अन्य किसिमको यौनजन्य अस्वाभाविक व्यवहार गरेमा बालयौन दुरुपयोग गरेको मानिन्छ ।
मुलुकी अपराध संहिता २०७४ ले बालयौन दुरुपयोगमा कसुरदार ठहर गरेको व्यक्तिलाई तीन वर्षसम्म कैद र तीस हजार रुपैयाँ जरिवाना हुने उल्लेख गरेको छ ।
