काठमाडौँ । प्रधानमन्त्री पुष्पकमल दाहाल ‘प्रचण्ड’ ले प्रधानमन्त्री चयनका सन्दर्भमा दिएको अभिव्यक्तिका विषयमा आपत्ति जनाउँदै प्रमुख प्रतिपक्षी नेकपा (एमाले) सहित विपक्षी दलले अवरोध गरेपछि प्रतिनिधिसभाको आजको बैठक स्थगन भएको छ ।
बैठक सुरु हुनेबित्तिकै नेकपा एमालेका सांसद रघुजी पन्तले आफूलाई प्रधानमन्त्री बनाउन प्रितम सिंह धेरैपटक दिल्ली गएको भन्ने प्रचण्डको अभिव्यक्तिले देशको सार्वभौमिकतामा आघात पुर्याएकाले राजीनामा दिनुपर्ने माग गरे।
‘आज बादल लागेको छ। तर, अहिले मौसममात्रै उदास छैन, नेपालीहरूको मनमा बादल लागेको छ। सम्मानीय प्रधानमन्त्री पनि नभनुँ कि जस्तो लाग्छ। नागरिकको भावनामा ठेस लागेको छ। सरदार प्रितम सिंहको किताब विमोचनमा दिएको अभिव्यक्तिले हाम्रो स्वाभिमानमा ठेस लागेको छ। नेपालको प्रधानमन्त्री बनाउन नेपालतिर जाने कि, दिल्लीतिर जाने?’ पन्तले भने।
त्यसपछि सभामुख घिमिरेले बैठक अघि बढाउन सत्तापक्षका सांसदलाई समय दिएपछि विपक्षी सांसद् उठेर ‘वेल’ घेराउ गर्न थालेपछि बैठक स्थगन भएको हो ।
सो विषयमा राष्ट्रियसभाको आजको पहिलो बैठक पनि स्थगन भएको थियो ।