काठमाडौँ । ललितपुर प्रहरीले चोरीमा संलग्न भएको अभियोगमा एक जोडीलाई पक्राउ गरेको ।
काठमाडौँ महानगर-१४ रविभवनमा रहेको सोल्टी सिटी अपार्टमेन्टमा बस्ने वर्ष ३९ को सुबोध श्रेष्ठ र सोही स्थानमा बस्ने वर्ष १९ की रोशनी महर्जनलाई चोरीको अभियोगमा प्रहरीले पक्राउ गरेको हो ।
चोरी गरेरै अस्ट्रेलिया जाने सपना अँगालेका उनीहरू डेढ वर्षदेखि अपार्टमेन्टमा बस्दै आएका थिए । पछिल्लो एक वर्षदेखि ‘लिभिङ टुगेदर’ मा थिए ।
उनीहरूले चोरी गरेकै पैसाले अपार्टमेन्टलाई मासिक ६० हजार भाडा तिर्ने गरेको, खाना पनि हरेक दिन रेष्टुरेन्टबाट मगाउने गरेको प्रहरी समक्ष बताएका छन् ।
सोल्टी सिटी अपार्टमेन्टको आठौँ तलामा रहेको टीसी१/८०३ नम्बरमा बस्दै आएका उनीहरूको साथबाट प्रहरीले विभिन्न स्थानबाट चोरी भएका सामानसहित पक्राउ गरेर आज सार्वजनिक गरेको हो ।
अष्ट्रेलिया जानका लागि आइएलटिएस गरिरहेको र त्यहाँ जान लाखौं रुपैयाँ लाग्ने भएपछि चोरी कार्यमा लागेको उनीहरूले प्रहरी समक्ष दिएको बयानमा भनेका छन् ।
गत जेठ २८ गते ललितपुर मानभवनमा रहेको ग्लोबल लिङ्क टेक्नोलोजीको कार्यालयमा भएको चोरीको अनुसन्धान गर्ने क्रममा प्रहरी सोल्टी सिटी अपार्टमेन्ट सम्म पुगेको थियो ।
उक्त कार्यालयमा रहेको काउन्टरको सेफबाट नगद रु एक लाख आठ हजार छ सय चौबिस रुपैयाँ, कम्पनीको प्रमुखको कोठाबाट नगद रु सैँतिस हजार रुपैयाँ र एक ल्यापटप चोरी भएको थियो ।
कार्यालय सिसिटिभी फुटेजमा चोरी गर्ने युवकले लगाएको जस्तो देखिने कपडाहरू समेत सोही अपार्टमेन्टबाट बरामद भएको जिल्ला प्रहरी परिसर ललितपुरका प्रवक्ता प्रहरी उपरीक्षक नवराज कार्कीले बताए ।
त्यहाँबाट घर फोड्न प्रयोग हुने रड, पिलास तथा पेचकस राखिएको झोला समेत भेटिएको छ ।
प्रहरीले अपार्टमेन्टबाट विभिन्न ब्रान्डका ११ थान ल्यापटप, एक थान आई फोन, तीन वटा किप्याड मोबाइल, हार्डडिक्स, एसएसडी कार्ड, मेमोरी कार्डहरू बरामद गरेको छ ।
साथै विभिन्न बैङ्कमा विभिन्न व्यक्तिको नाममा जम्मा गरिएको रसिद राखिएको झोला र रातो रङको डायरी समेत बरामद भएको एसपी कार्कीले बताए ।
पक्राउ परेका दुवैमाथि जिल्ला अदालत ललितपुरबाट सात दिनको म्याद थप गरेर विस्तृत अनुसन्धान भइरहेको प्रहरीले जनाएको छ ।
