कैलाली । कैलालीमा बुहारीको हत्या गरेर शवलाई खाडलमा गाडेपछि बुहारी हराएको भन्दै ससुराले प्रहरीमा निवेदन दिएको रहस्य खुलासा भएको छ ।
जेठ १८ गते बेलुका घरको भान्साकोठामा रोटी पकाइरहेकी बुहारीलाई पछाडिबाट टाउकोमा दाउराको चिर्पटले प्रहार गरेर हत्या गरेपछि सासु र ससुराले मिलेर बुहारीको शवलाई वननजिकै खाल्डो खनेर गाडेको प्रहरीको प्रारम्भिक अनुसन्धानबाट खुलेको छ ।
जिल्लाको गौरीगंगा नगरपालिका-१ गोप्कामा बस्ने २७ वर्षीया कौशी भन्ने कबिता बुढाको हत्या गरेको आरोपमा उनका ससुरा डिल्ली सिंह बुढा र सासु लहरी बुढालाई प्रहरीले नियन्त्रणमा लिएको छ।
सोही घटनामा अभियुक्तलाई लुकाउन सहयोग गर्ने भजनी नगरपालिका-४ बस्ने वर्ष ४१ को जयबिर बुढालाई समेत नियन्त्रणमा लिइएको जिल्ला प्रहरी कार्यालय कैलालीका निमित्त प्रवक्ता एवं प्रहरी निरीक्षक खगेन्द्र प्रसाद साउदले केटिएम दैनिकलाई बताए ।
घटनाको भोलिपल्ट डिल्ली सिंह बुढाले आफ्नी बुहारी घरबाट हराएको भन्दै जिल्ला प्रहरी कार्यालय, कैलालीमा निवेदन दिएका थिए । निवेदन दिएपछि उनी आठ वर्षीय नातीसहित बेपत्ता भएपछि प्रहरीले घटना शंकास्पद हुनसक्ने भन्दै अनुसन्धानलाई त्यसतर्फ मोडेको थियो ।
घटना भएको चार दिनसम्म पनि कविता सम्पर्कमा नआएपछि उनका माइती पक्षले इलाका प्रहरी कार्यालय चौमालामा निवेदन दिएका थिए । घटनाको अनुसन्धानका क्रममा केदारेश्वर सामुदायिक वनभित्र ८ फिट ४ इन्च गहिराई भएको खाल्डोमा गाडेको अवस्थामा कबिता बुढाको शव फेला परेको थियो ।
कबिता बुढाको हत्यामा उनका सासु लहरी बुढा र ससुरा डिल्लीसिंह बुढाको संलग्नता प्रारम्भिक चरणको अनुसन्धानबाट देखिएको थियो । प्रहरीले जेठ २३ गते सासुलाई घरबाट नै नियन्त्रणमा लिएको थियो भने ससुरा नातीसहित फरार थिए ।
फरार रहेका ससुराको खोजतलासका लागि मोबाइल ट्रयाक गर्दा उनी कञ्चनपुर जिल्लाको परासनमा रहेको पाइएपछि प्रहरी त्यसतर्फ लागेको थियो । प्रहरी आएको सूचना पाएपछि जयबिर बुढाले उनीहरूलाई भगाउन सफल भएका थिए ।
हत्याका मुख्य अभियुक्तलाई भगाएको आरोपमा प्रहरीले जयसिंह बुढालाई कञ्चनपुर जिल्लाको बिचफाँटाबाट जेठ २३ गते पक्राउ गरेको थियो ।
घटना ढाकछोप गर्न आफैंले हत्या गरेकी बुहारी कबिता बुढा हराई भनि प्रहरी कार्यालयमा निवेदन दिएर नातीसहित फरार रहेका मुख्य अभियुक्त डिल्ली सिंह बुढालाई प्रहरीले नेपाल भारत सीमावर्ती इलाकामा लुकिछिपी बसेको अवस्थामा जेठ २७ गते पक्राउ गरेको हो ।
मृतक कबिता बुढाका श्रीमान् अर्जुन बुढा एक वर्षदेखि कान्छि श्रीमतीको साथमा भारतको ब्याङ्लोरमा बस्दै आएको अनुसन्धानका क्रममा खुलेको छ । मृतक र उनका सासु ससुराबीच झै-झगडा हुने गरेको र घटना पूर्व पनि घरायसी झगडाका विषयमा इलाका प्रहरी कार्यालय चौमालामा गई मेलमिलाप गर्ने गरेको पाइएको छ ।
हत्या पश्चात सासु र ससुरा मिलेर लाशलाई डोकोमा हालेर घर भन्दा करिब ३ किलोमिटर टाढाको केदारेश्वर सामुदायिक वनमा लगेर खाल्डो खनी लाशलाई गाडेको र लाशसँगै मृतकका रगत लागेका कपडा, फरुवा र डोको पनि सोही खाल्डोमा पुरेको अनुसन्धानमा देखिएको प्रहरी निरीक्षक साउदले बताए ।
