काठमाडौं । वर्षाले खेल पटक पटक बिथोलेको खेल अन्ततः रद्द भएपछि नेपाल एसीसी प्रिमियर कपको फाइनलमा प्रवेश गरेको छ। शनिबार कीर्तिपुरस्थित त्रिवि मैदानमा कुवेतविरुद्धको सेमिफाइनल खेल वर्षाका कारण रद्द भएपछि नेपाल फाइनलमा पुगेको हो ।
नेपालले दिएको २८१ रनको लक्ष्य पछ्याएको कुवेतले ८.३ ओभरमा ६ विकेटको क्षतिमा ३७ रन जोड्दा खेल वर्षाले रोकिएको थियो । वर्षा हुनुअघि नेपालका करण केसीले पाँच विकेट लिएका थिए ।
प्रतियोगिताको नियम अनुसार दोस्रो इनिङ्समा टोलीले २० ओभर ब्याटिङ गरेमात्र डर्क वर्थ लुइस (डीएलए) प्रणालीबाट खेलको निर्णय हुन्थ्यो। २० ओभर नपुगे खेल रद्द हुन्थ्यो।
त्यो अवस्थामा सुपर ओभर खेलाएर नतिजा निकालिने नियम छ। तर सुपर ओभर पनि हुन नसक्ने अवस्था आएपछि नेपाल समूह विजेताका हैसियतमा स्वत: फाइनलमा पुगेको हो ।
त्रिवि क्रिकेट मैदानमा कुवेतले टस जितेर फिल्डिङ रोजेपछि ब्याटिङ गरेको नेपालले ४२ ओभरमा ९ विकेटको क्षतिमा २८१ रनको योगफल तयार पारेको थियो।
तर डकवर्थ लुइस मेथडका आधारमा नेपालले कुवेतलाई २८१ रनको लक्ष्य दिएको हो। वर्षाका कारण खेल रोकिएपछि ८ ओभर घटाइएको थियो।
समूह ‘ए’ मा नेपालले ३ खेल जित्दै ७ अंक बटुलेको थियो । कुवेतले समूह ‘बी’ मा ४ मध्येको ३ खेल जित्दै ६ अंक बटुली उपविजेता बनेको थियो ।
त्यस्तै अर्को सेमिफाइनल खेलमा पनि वर्षाले अवरोध पुर्याएपछि डकवर्थ लुइस प्रणालीमा अगाडि रहँदै यूएई फाइनलमा पुगेको हो । डकवर्थ लुइसमा यूएईले ओमानलाई २ रनले हराएको हो । एसीसी प्रिमियर कपको फाइनल सोमबार हुनेछ । फाइनलमा यूएईलाई हराएमा नेपाल एसिया कपका लागि छनोट हुनेछ ।