काठमाडौं । वैदेशिक रोजगारीको लागि न्यूजिल्याड पठाइदिने भन्दै विभिन्न व्यक्तिबाट रकम लिएर सम्पर्कबिहीन भएका एकव्यक्ति पक्राउ परेका छन् ।
यसरी पक्राउ पर्नेमा धादिङ निलकण्ठ नगरपालिका-३ पुछारबजार घर भई हाल टोखा नगरपालिका-६ बानियाँटार बस्ने वर्ष ३८ को हरिजंग गुरुङ रहेका छन् ।
गुरुले राजेश श्रेष्ठ लगायत विभिन्न व्यक्तिहरूलाई न्यूजिल्याण पठाइदिने आश्वासन दिएर रकम लिएका थिए । उनले त्यहाँ पुगेपछि प्रतिष्ठित होटलमा काम लगाइदिने र मासिक डेढ लाख तलब हुने भन्दै पीडितहरूलाई प्रलोभनमा पारेका थिए ।
उनले पटकपटक गरी पीडितहरूबाट पाँच लाख छ हजार रुपैयाँलिएर सम्पर्कबिहीन भएपछि पीडितले आफू ठगिएको भन्दै वैदेशिक रोजगार विभागमा उजुरी दिएका थिए ।
विभागले प्रहरीले खबर गरेपछि काठमाडौं उपत्यका अपराध अनुसन्धान कार्यालय, मिनभवनले टोलीले गुरुङलाई आइतबार (हिजो) बानियाँटारको धनेश्वर मन्दिर नजिकैबाट पक्राउ गरेको कार्यालयका प्रवक्ता प्रहरी उपरीक्षक सोमेन्द्र सिंह राठौरले बताए ।
पक्राउ परेका गुरुङलाई थप अनुसन्धान तथा कारवाहीको लागि वैदेशिक रोजगार विभाग बुद्धनगर, काठमाडौँ पठाईएको एसपी राठौरले बताए ।
