लमजुङ । डुम्रे बेंसीसहर सडक अन्तर्गत बेंसीसहर नगरपालिका-१ स्थित उदीपुरखण्ड दैनिक १२ घण्टा बन्द गरिएको छ ।
सो सडक खण्डको देउराली डाँडामा सडक मर्मत गर्न आजदेखि एक महिनासम्मका लागि दैनिक १२ घण्टा बन्द गरिएको हो । डुम्रे बेंसीसहर चामे सडकका इन्जिनियर पुरुषोत्तम अधिकारीले भने, “ सडक मर्मत गर्नका लागि आगामी जेठको पहिलो हप्तासम्म सडक बन्द गर्न लागेका छौं ।”
सडक निर्माण अन्तर्गत स्लोप ट्रमिङ र टेवा पर्खाल निर्माण हुने भएको छ । सो अवधिमा यात्रुवाहक सवारी साधनलाई उदीपुर रिठ्ठेबगर जोड्ने बाटो हुँदै चण्डीप्रसाद गण डाइभर्सन सडक प्रयोगमा ल्याइनेछ भने मालवाहक सवारी भने उदीपुर बजारमै पूर्ण रुपमा रोक लगाइएको उनको भनाइ छ ।
यहाँ दुई वर्षदेखि निरन्तर पहिरोका कारण अस्थायी रुपमा सडक व्यवस्थापन गर्दै आए पनि दैनिकजसो सुक्खा पहिरोले पटक-पटक सडक अवरुद्ध हुने मात्र नभई ज्यानै जोखिममा रहँदै यात्रुहरु यात्रा गर्न बाध्य हुँदै आएको थियो ।
उदिपुरमा पहिरोले सडक भत्किएसँगै विसं २०७८ भदौदेखि नै यात्रुहरुले सास्ती भोक्दै आएका छन् । सोही पहिरोका कारण विभिन्न सवारी साधन दुर्घटनासमेत भएको थियो । त्यस्तै, यस सडकखण्ड बन्द हुने भएपछि बेंसीसहर नगरपालिकाले वैकल्पिक सडकको स्तरोउन्नति गरेको छ ।
सोही स्थल नजिकैबाट करीब एक किलोमिटर सडक नगरपालिकाको रु १० लाखमा स्तरोन्नति सम्पन्न भएको नगरपालिकाले जनाएको छ ।