नेपालगञ्ज (बाँके) । नेपालगञ्जबाट प्रहरीले करीब पाँच किलो अवैध सुनका गरगहनासहित दुई जनालाई पक्राउ गरेको छ ।

नेपालगञ्जको न्यूरोडस्थित एक होटलबाट ४ दशमलव नौ सय २७ किलोग्राम सुनका विभिन्न गहनासहित उनीहरुलाई पक्राउ गरिएको हो ।

पक्राउ परेका व्यक्तिका साथबाट सुनका चुरा, ब्रासलेट, मङ्गलसुत्र, बाला, ढुङ्ग्री, औंठीलगायतका सुनका गहना प्रहरीले गएराति बरामद गरेको हो ।

गरगहना झोलामा राखेर हिंडिरहेको सुराकीका आधारमा मोरङ विराटनगर महानगरपालिका-९ बस्ने वर्ष ४२ को रमेश सोनी र सोही स्थानका वर्ष ३६ को प्रकाश ठाकुरलाई नियन्त्रणमा लिइएको आज पत्रकार सम्मेलनमार्फत जानकारी दिइयो ।

यसबारेमा प्रहरीले थप अनुसन्धान जारी राखेको जनाएको छ ।