झापा । कान्छी श्रीमती बनेर गएकी महिला र उनलाई श्रीमती स्वीकार्ने पुरुषलाई जेल चलान गरिएको छ ।
बहुविवाह गरेको अभियोगमा झापाको शिवसताक्षी नगरपालिका-१० सैनिकबस्ती, भालुखोला छेउ बस्ने वर्ष ३६ को मोहन शमसेर योङहाङ र सोही स्थानमा बस्ने वर्ष २६ कि पुजन अधिकारीलाई झापा जिल्ला अदालतको फैसलाअनुसार जेल पठाइएको हो ।
योङहाङ र अधिकारी दुवैको दोस्रो विवाह हो । योङहाङले २०६३ साल वैशाख २६ गते भिमकुमारी योङहाङ्गसँग विवाह गरेका थिए । उनीहरूका १४ र सात वर्षका दुई जना छोरी समेत छन् ।
त्यस्तै अधिकारीले माईधार घर भएका सन्तोष सेलिङसँग २०६६ सालमा प्रेम विवाह गरेकी हुन् । उनीहरूपट्टी एक छोरी छन् ।
सन्तोष वैदेशिक रोजगारीको सिलसिलामा विदेशमा भएको समयमा म्यानपावर व्यवसायी समेत रहेका मोहनकै म्यानपावरमा अधिकारीले काम गर्न थालेकी थिइन् । त्यस क्रममा उनीहरूको सम्बन्ध बढ्दै गएर उक्त सम्बन्ध विवाहमा परिणत भएको हो ।
मोहनको पहिलो श्रीमती भिमकुमारीले झापा जिल्ला अदालतमा दिएको बकपत्रमा कान्छी छोरीको जन्मपश्चात् श्रीमानले आफूलाई हेलाँ गर्न थालेको, अश्लील शब्द प्रयोग गर्न थालेको र कामको सिलसिलामा काठमाडौँ गएकोमा २०७८ असार १५ गते बिहान एक महिलासहित आएको र ती महिला आफ्नो कान्छी श्रीमती बताएको उल्लेख गरेकी छन् ।
भिमकुमारीले कान्छी श्रीमती बनेर आएकी अधिकारी आफ्नै गाउँको विवाहिता महिला भएको र घरमा श्रीमती र छोरीहरू भएको थाहा हुँदाहुँदै श्रीमानसँग आएकोमा कानुनबमोजिम कारबाहीको माग गर्दै बहुविवाहको मुद्दा दायर गरेकी हुन् ।
कान्छी श्रीमती बनेर गएकी अधिकारीका पहिलो श्रीमानले अदालतमा दिएको बयानमा २०७५ साल मङ्सिर ५ गते अधिकारी घरमा तरकारी सकिएकोले लिन बजार जान्छु भनेर हिँडेकोमा घर फर्की नआएको सात दिनपछि आफू काठमाडौँमा भएको र सोधखोज नगर्नु भनेर खबर पठाएको उल्लेख गरेका छन् । चार महिना पश्चात् आफू घरमा नभएको समयमा छोरीलाई लिएर काठमाडौँ गएको र त्यसपछि कहिलेकाहीँ फोनमा कुरा हुने गरेको तर भेटघाट नभएको बताएका छन्।
झापा जिल्ला अदालतका न्यायाधीश गिरीराज गौतमले २०७९ असार २० गते घरमा श्रीमान् र छोरीहरू हुँदाहुँदै दोस्रो विवाह गर्ने मोहन शमसेर योङहाङ र पहिलो श्रीमानलाई छाडेर कान्छी श्रीमती बनेर गएकी पुजन सेलिङ्ग अधिकारीलाई बहुविवाहमा दोषी ठहर गरेको छ । (अदालतको पूर्णपाठ लिंक )
अदालतले योङहाङलाई एक वर्ष तीन महिना कैद र २५ हजार रुपैयाँ जरिवाना साथै अधिकारीलाई एक वर्ष एक महिना कैद र १५ हजार जरिवाना तोकेको हो । अदालतले मुलुकी अपराध संहिता, २०७४ को दफा १७५ अनुसार उनीहरूको विवाह स्वत: बदर गरेको छ ।
फरार रहेका अधिकारी र योङहाङलाई प्रहरीले पक्राउ गर्न सफल भएको छ । उनीहरूलाई सोमबार पक्राउ गरी आज कैद भुक्तानको लागि कारागार पठाइएको जिल्ला प्रहरी कार्यालय झापाका प्रवक्ता प्रहरी नायव उपरीक्षक खगेन्द्र प्रसाद रिजालले केटिएम दैनिकलाई बताए ।
मुलुकी अपराध संहिताको दफा १७५ मा विवाहित पुरुषले वैवाहिक सम्बन्ध कायम रहेको अवस्थामा अर्को विवाह गर्न नहुने र कुनै पुरुष विवाहित हो भन्ने जानीजानी त्यस्तो पुरुषसँग कुनै महिलाले विवाह गर्न नहुने उल्लेख छ ।
र सोही दफामा उक्त विवाहलाई स्वत: वदर गरिने समेत लेखिएको छ ।