काठमाडौँ । राजधानीका विभिन्न सडकहरूमा ट्राफिक प्रहरी नदेख्दा धेरै दुई पाङ्ग्रे सवारी चालकहरूले ट्राफिक नियम मिच्ने गर्दछन् ।
यही कुरालाई मध्यनजर गर्दै ट्राफिक प्रहरी सिसिटिभीको सहायताबाट ट्राफिक नियम उल्लङ्घन गर्नेहरूलाई कारबाही गर्दै आइरहेको छ ।
काठमाडौँ उपत्यकाका ट्राफिक प्रहरी कार्यालय रामशाहपथका अनुसार गत श्रावणदेखि अहिलेसम्म सिसिटिभीको सहायतामा चार हजार ३१९ चालकलाई कारबाही गरिएको छ ।
काठमाडौँ उपत्यका प्रहरी कार्यालयमा रहेको सिसिटिभी कन्ट्रोल रुमले तत्काल दिएको सूचनाका आधारमा ३ हजार २९२ जना र ट्राफिक नियम उल्लङ्घन गरी फरार रहेका १ हजार २२ जना गरी ४ हजार ३ सय १४ जना चालकलाई काठमाडौँ उपत्यकाको विभिन्न स्थानबाट ट्राफिक प्रहरीले कारबाही गरेको हो ।
जसमा साउन महिनामा ३४१ जना, भदौमा ६८० जना, असोजमा ४८२ जना, कार्तिकमा ३६६ जना, मङ्सिरमा ६६२ जना , पुसमा ९२५ जना, माघमा ८१४ जना र फागुनमा ४४ जना चालकहरू रहेका छन् ।
ट्राफिक प्रहरीको आँखा छलेर नियम मिच्ने चालकलाई प्रविधिको सहायताले कारबाहीको दायरामा ल्याइएको र यसबाट सवारी आवागमन व्यवस्थापन तथा दुर्घटना न्यूनीकरणमा सहयोग पुगेको काठमाडौँ उपत्यका ट्राफिक प्रहरी कार्यालयका प्रवक्ता एवं प्रहरी वरिष्ठ उपरीक्षक राजेन्द्र प्रसाद भट्टले बताए ।
काठमाडौँ उपत्यका प्रहरी कार्यालय रानीपोखरीमा रहेको सिसिटिभी कन्ट्रोल रुममा खटिएका ट्राफिक प्रहरीले दिएको स्थान, समय, सवारी साधनको नम्बर, किसिम र कसुरका आधारमा सडकमा खटिएका ट्राफिक प्रहरीले चालकलाई कारबाही गर्ने गरेका छन् ।
ट्राफिक नियम उलङ्घन गरी फरार रहेका चालकलाई भने सिसिटिभी फुटेजका आधारमा काठमाडौँ उपत्यका ट्राफिक प्रहरी कार्यालयमा रहेको खोजतलास शाखाले यातायात व्यवस्था कार्यालयबाट विवरण लिएर सवारी चालक वा धनीलाई कार्यालयमै बोलाएर कारबाही गर्दै आएको छ ।
प्रविधिमैत्री बन्दै गएको काठमाडौँ उपत्यका ट्राफिक प्रहरी कार्यालयले सवारी आवागमन व्यवस्थापन र ट्राफिक नियम उल्लङ्घन गर्ने चालकलाई कानुनको दायरामा ल्याउन वि.सं. २०७४ सालबाट सिसिटिभी र वि.सं. २०७५ सालबाट सर्भिलेन्स भेहिकलद्वारा निगरानी गर्दै आइरहेको छ ।
