धनगढी । नागरिक उन्मुक्ति पार्टीकी सभापति रञ्जिता श्रेष्ठ चौधरीले आफ्नो पार्टी सधैँ अरूले प्रयोग गर्ने साधन नभएको बताएकी छिन ।
सुदूरपश्चिम प्रदेशमा आफैले समर्थन गरेर निर्माण गरेको नेकपा एमालेका राजेन्द्र रावल नेतृत्वको प्रदेश सरकार विश्वासको मत नपाएर आज ढले लगत्तै सभापति श्रेष्ठले आफ्नो पार्टी बिचारमा कट्टीबद्ध रहेको पनि जनाएकी छिन ।
‘हामी विचारमा कटिबद्ध छौँ, सबैले सधैं प्रयोग गर्ने साधन होइनौं,’ उनले सामाजिक सञ्जालमा लेखेकी छिन, ‘यो देश हाम्रो पनि हो, देशको शासन प्रशासनमा हाम्रो पनि सहभागिता रहनुपर्दछ, भौगोलिक सांस्कृतिक पहिचान नेपालीको पनि सम्मान हो, मूलवासीको अपमान गरेर मुलुक कहिल्यै समृद्धिशाली हुन सक्दैन, त्यसैले जनभावनाको कदर गरौँ, जनमतको कदर गरौँ ।’
आफ्ना पति रेशमलाल चौधरीको रिहाइ नगरेको तथा कैलालीका सांसद अरुणकुमार चौधरीलाई पक्राउ गरे पछि आक्रोशित हुँदै आएको उन्मुक्ति पार्टीले सत्ता साझेदार एमालेबाट मुख्यमन्त्री भएका रावललाई विश्वासको मत नदिँदा महिना दिनमा नै सुदूरपश्चिम सरकार ढल्न पुगेको छ । गत २७ पुसमा उन्मुक्तिको समर्थनमा रावल सुदूरपश्चिम सरकारको मुख्यमन्त्री नियुक्त भएका थिए ।
‘अहिलेसम्म राज्य टीकापुर घटनाप्रति अनुदार छ, मानव अधिकारकर्मीहरूले आँखा खोलेका छैनन्। हामीलाई उचालल्नेहरुको ताँती पनि लामै छ तर हामी न्यायको पालना गरेर जेलमा चौखुरिएर बस्न बाध्य छौँ,’ उनले फेसबुकमा लामो स्ट्याटस लेख्दै प्रश्न गरेकी छिन, ‘राष्ट्र प्रति हिजो आज र भोलि पनि उत्तिकै बफादार थारुलाई न्यायिक दृष्टिको प्रकाश किन परिरहेको छैन ? झ्यालखानाको बुइँगलबाट न्यायको घाम झुल्किन्छ कि भनेर हामी सधैं नियालिरहन्छौ।’
उनका अनुसार न्यायको पारिलो घाम आँखाले देख्दादेख्दै पनि शासकले छानो हालेर जबरजस्ती छाया बनाइरहेको पनि प्रस्टै देखिएको श्रेष्ठको भनाई छ ।
