काठमाडौं । सरकारले मोटरसाइकलको कर तथा नवीकरण शुल्क भुक्तानीमा जरिवाना छुटको घोषणा गरेको छ ।
यातायात व्यवस्था कार्यालय, मोटरसाइकल काठमाडौंले आउँदो फागुन महिनाभित्र मोटरसाइकलको कर तथा नवीकरण शुल्क भुक्तानी गर्दा ५ वर्षसम्मको जरिवाना छुट दिने घोषणा गरेको हो ।
आर्थिक वर्ष २०७०/०७१ देखि कर बुझाउन बाँकी रहेकाहरूलाई अहिले कर बुझाएमा छुट दिइनेसमेत कार्यालयले सूचना जारी गरेर जानकारी गराएको हो।
बागमती प्रदेश आर्थिक ऐन २०७९ को दफा १८ ले आर्थिक वर्ष २०७०/०७१ देखि आर्थिक वर्ष २०७५/०७६ सम्म तोकिएबमोजिम कर तथा नवीकरणसमेत भुक्तानी नगरेका सवारी धनीले फागुन मसान्तभित्र कर बुझाउन आएमा प्रदेश सवारी तथा यातायात व्यवस्था ऐन २०७५ अनुसार लाग्ने सो अवधिको जरिवाना छुटको व्यवस्था गरेको सूचनामा उल्लेख छ।
प्रयोगमा नभएका सवारी साधनहरू चालु आर्थिक वर्षसम्मको कर नवीकरण तथा जरिवाना रकम भुक्तानी गरी विधिवत लगतकट्टा गर्नसमेत कार्यालयले सवारी धनीहरूलाई आग्रह गरेको छ।
यस्तै, कार्यालयले आफ्नो नामको सवारीसाधनको समयमै नवीकरण गरी कर भुक्तानी गर्न सबैलाई आग्रह गरेको छ । साथै, ट्राफिक कारबाहीमा परी सवारीसाधन नियन्त्रणमा रहेकाहरुलाई पनि अविलम्व कर भुक्तानी गरी जरिवाना छुटको लाभ लिन कार्यालयले आग्रह गरेको छ ।
कार्यालयले जारी गरेको सूचनामा भनिएको छ, ‘सवारीसाधन कर नवीकरण शुल्क र दण्ड जरिवानाको रकमबाट कुनै पनि वहानामा उन्मुक्ति नमिल्ने भएकाले समयमा नै सवारीसाधनको कर तथा बक्यौता रकम भुक्तानी गर्नुहुन अनुरोध गरिन्छ ।’ कार्यालयले कर भुक्तानी नगरेकाको लगत संकलन गरी कडाईका साथ जरिवाना उठाउने समेत जनाएको छ ।