एक पाकिस्तानी नागरिकलाई क्यान्डा पठाइदिने भन्दै पाकिस्तानबाट नेपाल बोल्याएर यहाँ अपहरण गरी फिरौती माग्ने तीनजनालाई प्रहरीले पक्राउ गरेको छ ।
यसरी पक्राउ पर्ने नागरिकहरू पनि पाकिस्तानी नै भएको खुलेको छ । काठमाडौँ उपत्यका अपराध अनुसन्धान कार्यालयका अनुसार वैदेशिक रोजगारीका लागि क्यानडा जान नेपालबाट सहज हुन्छ भन्दै पाकिस्तानबाट नेपाल बोल्याएर अपहरणपछि फिरौती माग गरेको अभियोगमा पाकिस्तानी नागरिकहरू मुहम्मद रासिद, मुहम्मद आसिफ र मुहम्मद फिदा हुसैन काठमाडौंबाट पक्राउ परेका हुन् ।
उनीहरूले पाकिस्तानी नागरिक मोहम्मद सामी खानलाई पाकिस्तानबाट नेपाल बोलाएर ठमेलस्थित एक होटेलमा बस्न लगाएका थिए ।
उनीहरूले बायोमेट्रिक लगायतका प्रक्रिया पूरा गर्न भन्दै होटेलबाट ट्याक्सीमा राखेर पुस २४ गते दिउँसो साढे २ बजेको समयमा बुढानीलकण्ठस्थित भाडाको घरमा पुर्याएर निजको आँखामा पट्टी तथा हातखुट्टासमेत बाँधेर बोल्न नसक्ने गरी बन्धक बनाएर राखेको अपराध अनुसन्धान कार्यालयले जनाएको छ ।
प्रहरी उपरीक्षक कृष्णप्रसाद कोइरालाका अनुसार आरोपित तीनै जनाले पीडितका पाकिस्तानमा रहेका भाइलाई आफू क्यानडा जान लागेको र ३० घण्टासम्म मोबाइल अफ हुन्छ भनेर म्यासेजसमेत गर्न लगाएका थिए । ३० घण्टापछि पीडितलाई फेरि आफ्नो भाइलाई म्यासेजमार्फत आफू क्यानाडाको इमिग्रेसनमा रोकिएको र पैसा बुझाए मात्र प्रवेश दिन्छ भनेर पाकिस्तानमा ३० लाख पाकिस्तानी रुपैयाँ र २४ हजार युएइ दिरामसमेत गरी २५ लाख ६६ हजार ६९७ नेपाली रुपैयाँ फिरौती रकम लिन सफल भएका थिए ।
रकम लिइसकेपछि निजहरूले पीडित मोहम्मद सामी खानलाई पुस २६ गते राति अन्दाजी साढे १० बजे ट्याक्सीमा राखेर सिनामंगलस्थित सडकमा पाकिस्तान फर्कनु भनेर छाडी फरार भएको प्रहरीको भनाइ छ । उनीहरूलाई पुस २८ गते बुढानीलकण्ठस्थित भाडाको घरबाट दसीका सामानसहित पक्राउ गरिएको प्रहरीले जनाएको छ ।
