वितेको २४ घण्टामा देशका विभिन्न भागमा भएका सवारी दुर्घटनामा छ जनाले ज्यान गुमाएका छन् । धनुषा, सर्लाही, झापा, पाल्पा, बारा र मोरङमा भएका सवारी दुर्घटनामा पाँच पुरुष र एक महिलासहित छ जनाको निधन भएको प्रहरीले जनाएको छ ।
धनुषाको मिथिला बिहारी नगरपालिका-२ धमौरा पोखरीस्थित सडकमा ज.२ त ९५२५ नम्बरको ट्याक्टरमा प्र.२-०२-००५ प ५४३७ नम्बरको मोटरसाइकल ठक्कर खाई बुधबार दिउँसो दुर्घटना हुँदा मोटरसाइकलमा सवार धनुषाधाम नगरपालिका-३ बस्ने ३५ वर्षीया सावित्री देवी मण्डलको घटनास्थलमै मृत्यु भएको छ । साथै दुर्घटनामा घाइते मोटरसाइकलका चालक समेत २ जनालाई उपचारको लागि प्रादेशिक अस्पताल जनकपुर पठाइएको छ । हाल फरार ट्याक्टर चालकको प्रहरीले खोजी गरिरहेको छ ।
सर्लाहीको पर्सा गाउँपालिका-२ संग्रामपुरस्थित सडकमा वी आर ०१ बी ५९१७ नम्बरको मोटरसाइकलको ठक्करबाट पैदलयात्री सोही ठाउँ बस्ने ७५ वर्षीय नथुनी बैठाको बुधबार साँझ मृत्यु भएको छ । ठक्करबाट गम्भीर घाइते भएका उनको स्थानीय मेडिकल नारायणपुरमा उपचारको क्रममा मृत्यु भएको हो । मोटरसाइकल र चालकलाई प्रहरीले नियन्त्रणमा लिएको छ ।
झापाको कमल गाउँपालिका-५ लवडाडास्थित सडकमा प्र.१-०१-०१६ प २०९४ नम्बरको स्कुटर र मे.२ प २१५७ नम्बरको मोटरसाइकल बुधबार साँझ एकआपसमा ठक्कर खाई दुर्घटना हुँदा मोटरसाइकल चालक मोरङ मिक्लाजुङ गाउँपालिका-७ बस्ने ३८ वर्षीय नरेन्द्र सेलिङको मृत्यु भएको छ । दुर्घटनामा गम्भीर घाइते भएका उनको उपचारको लागि लाईफलाईन अस्पताल दमकतर्फ लैजाने क्रममा बाटोमै मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको सोही अस्पतालमा उपचार भइरहेको छ । प्र.१-०१-०१६ प २०९४ नम्बरको स्कुटरले प्र.१-०१-०१५ प ७४८७ नम्बरको स्कुटर समेतलाई ठक्कर दिएको थियो । तीनवटै सवारी साधन र दुई वटै स्कुटरका चालकलाई प्रहरीले नियन्त्रणमा लिएको छ ।
पाल्पाको पूर्वखोला गाउँपालिका-३ कमेरेस्थित सडकमा लु.३ त ६२५९ नम्बरको ट्याक्टरले किच्दा ट्याक्टरका सहचालक सोही नगरपालिका-३ भालकुन बस्ने २८ वर्षीय सेते सारुको बुधबार राति घटनास्थलमै मृत्यु भएको छ । ट्याक्टर र चालकलाई प्रहरीले नियन्त्रणमा लिएको छ ।
बाराको जितपुरसिमरा उपमहानरपालिका-२ स्थित सडकमा ना.२० प ७१६४ नम्बरको मोटरसाइकललाई ना.७ ख ४२३७ नम्बरको टेलर गाडीले बुधबार राति ठक्कर दिँदा मोटरसाइकलमा सवार हाल नाम, थर, वतन नखुलेका अन्दाजी ३० वर्षीय पुरुषको मृत्यु भएको छ । दुर्घटनामा गम्भीर घाइते भएका उनको नारायणी उपक्षेत्रीय अस्पताल वीरगंजमा उपचारको क्रममा मृत्यु भएको हो । दुवै सवारी साधन र गाडीका चालकलाई प्रहरीले नियन्त्रणमा लिएको छ ।
मोरङको उर्लाबारी नगरपालिका-७ उर्लाबारी इटहरास्थित सडकमा प्रदेश १-०२-०४२ प ८४०४ नम्बरको स्कुटरको ठक्करबाट पैदलयात्री सोही ठाउँ बस्ने ६५ वर्षीय खड्ग बहादुर लिम्बुको बुधबार साँझ मृत्यु भएको छ । ठक्करबाट गम्भीर घाइते भएका उनको बिएण्डसी अस्पताल बिर्तामोडमा उपचारको क्रममा मृत्यु भएको हो । स्कुटर र चालकलाई प्रहरीले नियन्त्रणमा लिएको छ ।