नाबालिका बलात्कार आरोपमा पुर्पक्षका लागि थुनामा रहेर मुद्दा लडिरहेका नेपाली राष्ट्रिय टिमबाट निलम्बित पूर्वकप्तान सन्दीप लामिछानेको पुनरावेदनको पेसी आज (बिहीवार) परेको छ।
पाटन उच्च अदालतमा हुने पेसीमा आज नै बहस र फैसला हुनसक्ने सम्भावना रहेको सन्दीप पक्षधर वकिलहरु बताउँछन् । गत साताका लागि नै पेसी तोकिए पनि ‘बार डे’ परेपछि सन्दीप पक्षका वकिलहरूले उक्त दिनको पेसी स्थगित गरेका थिए।
यसअघि बलात्कार आरोपित क्रिकेटर लामिछानेबाट पीडित किशोरीको जन्म सम्बन्धी प्रमाण झिकाउन काठमाडौं जिल्ला अदालतले आदेश दिएको थियो।
लामिछानेमाथि नाबालिग (१८ वर्षमुनि) लाई बलात्कार गरेको आरोप छ। तर सन्दीपको पक्षले किशोरी १८ वर्ष मुनिको नभएको भन्दै आएका छन्। तर केटिएम दैनिकले प्राप्त गरेको किशोरीको आठ कक्षाको जिल्ला स्तरीय परीक्षाको मार्कसिट, जन्मदर्ताको पहिलो प्रतिलिपि र नागरिकतामा नै किशोरीको उमेर घटना हुने समयसम्म १८ वर्षभन्दा कम छ ।
सन्दीपले १७ वर्षीय नाबालिगलाई गत भदौ ५ गते काठमाडौंको एक होटलमा पुर्याएर दुई पटक बलात्कार गरेको भन्दै भदौ २१ गते प्रहरी वृत्त गौशालामा जाहेरी दिएकी थिइन् ।
प्रहरीमा जाहेरी पर्दा पूर्वनिर्धारित कार्यक्रमअनुसार सन्दीप क्यारेवियन प्रिमियर लिंग खेल्नको लागि वेष्टइन्डिज पुगेका थिए ।
उनीविरूद्ध पक्राउ पुर्जी जारी भइसक्दा पनि नेपाल नफर्किएपछि प्रहरीले इन्टरपोलमार्फत् डिफ्युजन नोटिस पनि जारी गरेको थियो। झण्डै एक महिना सम्पर्कबिहीन भएका लामिछाने डिफ्युजन नोटिस जारी भएपछी अमेरिकाबाट नेपाल फर्किएका थिए ।
किन भइरहेको छ उमेरको विवाद?
नेपालको कानुनअनुसार १८ वर्ष भन्दा कम उमेरको किशोरीले सहमतिमै शारीरिक सम्बन्ध राखेको खण्डमा पनि उक्त सम्बन्ध बलात्कार ठहरिन्छ । मुलुकी अपराध (संहिता) ऐन २०७४ को परिच्छेद १८ मा करणी सम्बन्धी कसुरको बारेमा व्यवस्था गरिएको छ । जस अनुसार दफा २१९ मा कसैले जबर्जस्ती करणी गर्न हुँदैन भन्ने व्यवस्था गरेको छ । कसैले कुनै महिलालाई निजको मञ्जुरी नलिई करणी गरेमा वा मञ्जुरी लिएर भए पनि अठार वर्षभन्दा कम उमेरको कुनै बालिकालाई करणी गरेमा निजले त्यस्तो महिला वा बालिकालाई जबर्जस्ती करणी गरेको मानिने कानुनले व्यवस्था गरेको छ ।
१८ वर्षभन्दा माथिको भएको खण्डमा कम सजाय दिलाउनको लागि यस विषयमा बहस सुरु गरिएको नाम नखुलाउने सर्तमा एक अधिवक्ताले भने ।