क्रिकेटर सन्दीप लामिछानेविरुद्ध जाहेरी दिने किशोरीको जन्मिएको अस्पतालबाट कागजात झिकाउन अदालतले आदेश दिएको छ ।
काठमाडौं जिल्ला अदालतका न्यायाधीश हिमलाल बेल्बासेको इजलासले उमेर विवाद निरुपण गर्न जन्म भएको भनिएको नारायणी अस्पताल वीरगञ्जबाट जन्म दर्ताको कागजात झिकाउने आदेश दिएको हो ।
सन्दीप लामिछानेका वकिल सरोजकृष्ण घिमिरेका अनुसार जिल्ला अदालत काठमाडौंले मंगलबार तीनवटा आदेश गरेको छ ।
किशोरीको जन्म हुँदा उनीहरु वीरगञ्जमा रहेको र त्यहीँको नारायणी अस्पतालमा किशोरीको जन्म भएको दावी गरिएको छ ।
सन्दीपक्षका वकिलका अनुसार किशोरीको जन्म २०६१ साल जेठ १८ गते बिहान ६ बजे भएको थियो ।
त्यहाँ किशोरीको आमाको नाम उल्लेख गरिएको र छोरीको जन्म भएको भनेर उल्लेख गरिएको सन्दीपपक्षका वकिलले दावी गरेका छन् ।
मंगलबारकै आदेशमा किशोरीको स्वास्थ्य परीक्षण गर्ने चिकित्सकलाई पनि बकपत्रका लागि बोलाउने आदेश भएको छ । जाहेरीपछि किशोरीको स्वास्थ्य परीक्षण गर्ने डाक्टरले अब बकपत्रका लागि काठमाडौं जिल्ला अदालतमा आउनुपर्नेछ ।
त्यसैगरी किशोरी र सन्दीप लामिछाने दुवैका साथी भनिएका क्रिकेटर देव खनाललाई पनि बुझ्ने आदेश भएको छ । अधिवक्ता घिमिरेका अनुसार मंगलबारको सुनुवाइपछि यी तीनवटा विषयमा बुझ्ने आदेश भएको हो ।