२०७८ साल कात्तिकमा ललितपुरबाट २२० सिसिको मोटरसाइकल चोरी भयो । स१०प १३२७ नम्बरको उक्त मोटरसाइकल चोरी भएपछि सवारीधनीले कात्तिक २५ गते काठमाडौं उपत्यका ट्राफिक प्रहरी कार्यालय रामशाहपथमा निवेदन दिए ।
एक वर्षअगाडि देखि हराएको मोटरसाइकन पाउनै आस नै थिएन तर ट्राफिक प्रहरीले सो मोटरसाइकलको नम्बर प्लेट परिवर्तन गरेर चलाउँदै गरेको अवस्थामा सोमबार काभ्रेपलाञ्चोकको रोशि गाँउपालिका घर भइ हाल काठमाडौँको बुढानिलकण्ठ बस्ने २८ वर्षिय वाङजु लामालाई पक्राउ गर्यो ।
ट्राफिक प्रहरीले सोमबार साँझ ५ बजे काठमाण्डौको बानेश्वरबाट परिवर्तित नम्बर बा९३प ८७८ प्रयोग गरी लामालाई चलाइरहेको अवस्थामा भेटेपछि पक्राउ गरेको हो । पक्राउ परेका लामालाई आवश्यक अनुसन्धान तथा कारवाहीको लागि आज जिल्ला प्रहरी परीसर जावलाखेल ललितपुर पठाइएको छ ।
हराएका सवारी साधन खोजतलास र चोरी नियन्त्रण कार्य निरन्तर हुँदै आएकोमा स्वयं सवारी धनी पनि बिशेष सजग हुनुपर्ने र सवारी चालक पनि थप जिम्मेवार बनि सुरक्षित स्थानमा मात्र सवारी साधन पार्किङ गर्ने, अतिरिक्त लक तथा सुरक्षाका उपायहरुको समेत प्रयोग गर्ने गरेमा चोरी नियन्त्रणमा प्रभावकारी भुमिका खेल्नसक्ने प्रहरी वरिष्ठ उपरीक्षक भट्टले बताए ।
सवारी साधन हराएको थाहा पाउनासाथ ट्राफिक प्रहरीको हटलाईन नम्बर १०३, नेपाल प्रहरीको हटलाईन नम्बर १०० मा फोन गर्न र नजिकको प्रहरी कार्यालयमा निवेदन दिन सकिनेछ ।