प्रतिनिधि सभा निर्वाचनमा प्रत्यक्षतर्फ सहभागी भएका दुई हजार ४११ उम्मेदवारमध्ये १६५ जना निर्वाचित हुँदै अबको पाँच वर्षको लागि सांसद भएका छन् । निर्वाचनमा सहभागी भएका नौ जना उम्मेदवारले जम्मा एक भोट मात्र पाउँदा ९०६ जनाले १०० भोट पनि नपाएको निर्वाचन आयोगको तथ्याङ्कले देखाउँछ । १०० भोट पनि नकटाउने उम्मेदवाहरू ३७ दशमलव ५८ प्रतिशत रहेका छन् ।
निर्वाचनमा सहभागी भएका २२५ महिलामध्ये नौ जना निर्वाचित हुँदा एक सय ११ जनाले १०० भन्दा कम मत पाएका छन् । १०० भन्दा कम मत पाउनेमा ७९५ जना पुरुष उम्मेदवार छन् । यसरी कम भोट पाउनेमा सबैभन्दा धेरै स्वतन्त्र उम्मेदवार छन् । स्वतन्त्र रूपमा उम्मेदवारी दिएका ५०१ जना पुरुष र ६६ महिला गरी कूल ५६७ जना उम्मेदवार छन् ।
स्वतन्त्रलाई छाड्ने हो भने ४३ विभिन्न राजनीतिक दलबाट २९४ पुरुष र ४५ महिला उम्मेदवार गरी ३३९ जनालाई १०० जना मतदाताले पनि नरुचाएको देखिन्छ ।
तथ्याङ्क विश्लेषण गर्दा चार जना उम्मेदवारहरूले १०० भोट पाएको देखिन्छ । तीमध्ये तीन जना स्वतन्त्र उम्मेदवार हुने भने एक जना बच्चा काखमा लिएकी आमा एकल चुनाव चिह्न लिएर निर्वाचनमा सहभागी भएको नेपाल नौलो जनवादी पार्टीका उम्मेदवार हुन् । १०० मत पाउने चारै जना पुरुष उम्मेदवार रहेका छन् ।
निर्वाचनमा सहभागी भएका नौ उम्मेदवारले एक भोट पाउँदा दुई भोट पाउने उम्मेदवारको सङ्ख्या आठ छ । स्वतन्त्र उम्मेदवारी दिएका सात पुरुष र एक महिलाले दुई भोट मात्र पाएका छन् । त्यस्तै तीन महिलासहित ११ जनाले तीन मत मात्र पाउँदा चार मत पाउनेको उम्मेदवारको सङ्ख्या आठ पुरुषसहित १२ छ । राष्ट्रिय स्वतन्त्र पार्टीका एक उम्मेदवारसहित १२ स्वतन्त्र उम्मेदवारलाई पाँच जना मतदाताले मात्रै भोट दिएका छन् ।
सिङ्गल डिजिट (९ वा सो भन्दा कम) भोट पाउने उम्मेदवारको सङ्ख्या १०५ रहेको छ । छ राजनैतिक दल र स्वतन्त्रबाट २३ महिलासहित १०५ जनाले नौ वा सो भन्दा कम मत पाएका छन् । २१ महिलासहित ९९ स्वतन्त्र उम्मेदवारले सिङ्गल डिजिटमा मत पाउँदा सङ्घीय लोकतान्त्रिक राष्ट्रिय मञ्च, लोकतान्त्रिक समाजवादी पार्टी, नेपाल, राष्ट्रिय जनमुक्ति पार्टी, नेपाल मजदुर किसान पार्टी, जनसमाजवादी पार्टी नेपाल र आमूल परिवर्तन मसिहा पार्टी नेपालबाट निर्वाचनमा सहभागी भएका एक/एक जनाले सिङ्गल डिजिटमा भोट पाएको देखिन्छ ।
राष्ट्रिय पार्टी बनेका जनता समाजवादी पार्टी, नेपाल, राष्ट्रिय स्वतन्त्र पार्टी, राष्ट्रिय प्रजातन्त्र पार्टी र जनमत पार्टीका उम्मेदवारहरूले समेत १०० मत कटाउन नसकेको निर्वाचन आयोगले उपलब्ध गराएको तथ्याङ्कमा उल्लेख छ । जसपाका १८ पुरुष र चार महिला गरी २२ उम्मेदवार, राष्ट्रिय स्वतन्त्र पार्टीबाट दुई उम्मेदवार, जनमत पार्टीका चार उम्मेदवार र राप्रपाका एक उम्मेदवारलाई मतदाताले १०० भोट समेत दिएनन् ।
प्रदेशगत रूपमा हेर्दा बागमती प्रदेशमा ५२ महिलासहित ३११ जना, मधेस प्रदेशमा १३ महिलासहित २५४ जना, प्रदेश १ मा २१ महिलासहित १४९ जना, लुम्बिनी प्रदेशमा १२ महिलासहित १०७ जना, गण्डकी प्रदेशमा नौ महिलासहित ५६ जना, सुदूरपश्चिम प्रदेशमा तीन महिलासहित १९ जना र कर्णाली प्रदेशमा एक महिलासहित १० जनाले १०० भोट नपाएको देखिन्छ ।
अघिल्लो र यस निर्वाचनमा ससंदमा एकल प्रतिनिधित्व गरेको नेपाल मजदुर किसान पार्टीका ५५ पुरुष र सात महिला गरी ६२ जनाले सय मत पनि पाएनन् । राजनैतिक दलबाट १०० मत पनि नपाउने सबैभन्दा धेरै उम्मेदवार नेमकिपाका छन् ।
प्रतिनिधि सभाको निर्वाचनमा उम्मेदवारी दिँदा पुरुष उम्मेदवारले १० हजार र महिला, दलित वा अल्पसङ्ख्या समुदाय वा आर्थिक रूपले विपन्न उम्मेदवारको हकमा पाँच हजार रुपैयाँ धरौटी राख्नुपर्ने हुन्छ । निर्वाचन ऐनले आर्थिक रूपले विपन्न उम्मेदवार भन्नेले वार्षिक रूपमा पारिवारिक आय पचास हजार रुपैयाँ भन्दा कम भएको भनी सम्बन्धित स्थानीय तहले सिफारिस गरेको व्यक्तिलाई बुझिने जनाएको छ ।
सदर मतको १० प्रतिशत मत नपाउने उम्मेदवारको जमानत जफत हुने प्रतिनिधि सभा निर्वाचन ऐन २०७४ को दफा ७१ मा उल्लेख छ । सोही दफामा धरौटी बुझाएका दल वा उम्मेदवारले निर्वाचनको परिणाम घोषणा भएको मितिले तीन महिनाभित्र फिर्ता लिनुपर्ने नलिएमा उक्त रकम सङ्घीय सञ्चित कोषमा दाखिला हुने उल्लेख छ ।
९०६ उम्मेदवारहरूको विस्तृत विवरण । यहाँ सबैभन्दा कम मत पाउनेहरुको क्रमअनुसार राखिएको छ ।
