पोर्चुगल पठाइदिन्छु भनी रकम ठगी गरेको अभियोगमा एक व्यक्ति आज पक्राउ परेका छन् ।
झापा कनकाई नगरपालिका-७ घर भई हाल भक्तपुर गठ्ठाघर बस्ने ३८ वर्षीय सञ्जिव आचार्यलाई प्रहरीले भक्तपुरको गठ्ठाघरबाट पक्राउ गरेको हो ।
पोर्चुगल पुगेपछि प्रतिष्ठित कम्पनीमा काममा लगाइदिन्छु भनेर ठगी गरेको भन्दै उमेश अधिकारी समेत चार जनाले वैदेशिक रोजगार विभागमा उजुरी दिएका थिए । आचार्यले आफूहरूलाई वर्किङ भिसामा पोर्चुगल पठाउने र त्यहाँ गएपछि मासिक रु. १ लाख कमाई हुन्छ भनी विश्वास दिलाएको ठगीमा परेकाहरूले बताएका छन् ।
विभागले काठमाडौँ काठमाडौँ उपत्यका अपराध अनुसन्धान कार्यालयलाई सम्बन्धित व्यक्ति पक्राउ गरी उपस्थित गराइदिन अनुरोध गरेपछि उनलाई पक्राउ गरिएको हो ।
आचार्यले चार व्यक्तिबाट २७ लाख रुपैयाँ ठगी गरेको खुलेको छ । अन्य व्यक्तिहरू पनि आचार्यबाट ठगीमा परेको भए सम्पर्कमा आउन प्रहरीले अनुरोध गरेको छ ।
उनलाई थप अनुसन्धान तथा कारबाहीको लागि वैदेशिक रोजगार विभाग बुद्धनगर काठमाडौँ पठाइएको छ ।