लागुऔषध सेवन (लापसे) गरी सवारी साधन चलाउने पाँच जनालाई ५ दिनको म्याद थप गरिएको छ ।
शनिबार काठमाडौँको तार्केश्वर नगरपालिका-८ शेषमती पुलबाट नियन्त्रणमा लिइएका पाँच जना चालक विरुद्धमा आज लागुऔषध सेवनको कसुरमा पाँच दिनको म्याद थप गरिएको छ ।
काठमाडौँ उपत्यका ट्राफिक प्रहरी कार्यालय रामशाहपथ, लागुऔषध नियन्त्रण व्युरो कोटेश्वर र, नेपाल प्रहरी अस्पताल महाराजगंजको संयुक्त टोलिले शेषमती पुलमा सवारी साधन चेकजाँच गर्दा लागुऔषध सेवन गरी सवारी साधन चलाउदै गरेको अवस्थामा ५ जना चालकलाई हिजो दिउँसो नियन्त्रणमा लिइएको काठमाडौँ उपत्यका ट्राफिक प्रहरी कार्यालयका सह-प्रवक्ता एवम् प्रहरी उपरीक्षक अवदेश बिष्ट क्षेत्रीले जानकारी दिए ।
जरङ्खुबाट शेषमतीतर्फ आउँदै गरेको बा४८प ६०२ नम्बरको स्कुटर, बा९४प ३१३३, बा८५प ४८५६ र बा५२प ६१३० नम्बरको मोटरसाइकलहरु चेक गर्दा लागऔषध सेवन गरी सवारी साधन चलाएको पाइएको थियो ।
तीनवटा दुईपाङ्ग्रे सवारीसाधनमा रहेका कपिलवस्तुको चन्द्रौटा नगरपालिका ६ घर भइ हाल कामनपा-१६ बस्ने २२ वर्षीय दिपेश सुनुवार, नुवाकोटको पकनी गाँउपालिका ६ घर भइ कामनपा-६ बस्ने २३ वर्षीय रोशन तामाङ, काभ्रेपलाञ्चोकको पाँचखाल घर भइ तार्केश्वर नगरपालिका ४ बस्ने ३१ वर्षीय प्रलाद लामा, स्याङ्जाको दरौ गाँउपालिका ७ घर भइ कामनपा-१६ बस्ने २९ वर्षीय मोहन वि.क. र सिन्धुलीको गौरीबास घर भइ तार्केश्वर नगरपालिका-४ बस्ने २१ वर्षीय अमित थापा मगरलाई टि.एच.सि (टेट्रा हाईड्रो क्यानाबिनोल) किटको प्रयोग गरी पिसाव चेक गर्दा लागुऔषध सेवन गरेको पाइएको थियो ।
हिजो दिउँसो नियन्त्रणमा आएका उनिहरुलाई आवश्यक अनुसन्धान तथा कारवाहीका लागी प्रहरी वृत्त बालाजुमा बुझाइएकोमा उनिहरु उपर लागुऔषध सेवन विरुद्धको कसुरमा आज दिन ५ (पाँच) म्याद थप भएको छ ।
ट्राफिक प्रहरीले गत साउन ९ गतेबाट सवारी साधनका चालकहरुले लागुऔषध सेवन गरी सवारी साधन चलाए नचलाएको सम्बन्धमा प्राविधिक टोली सहित टि.एच.सि. किटको प्रयोग गरी चेकजाँच अभियान सुरु गरेको थियो । लागुऔषध सेवन गरी सवारी साधन चलाउँदा दुर्घटना बढ्ने र यसले जीवन क्षतीको जोखिम पनि हुने भएकाले संभावित जोखिम कम गर्न लागु पदार्थ सेवन विरुद्धको चेकिङ अभियानलाई तिव्रता दिइएको प्रहरी उपरीक्षक क्षेत्रीले बताए।