अत्याधिक धुवाँ फाल्ने र यान्त्रिक अवस्था ठिक नभएका ३८ वटा सवारीसाधनलाई आज कारबाही गरिएको छ ।
काठमाडौँ उपत्यका ट्राफिक प्रहरी कार्यालय रामशाहपथका अनुसार बबरमहलमा आज गरिएको विशेष चेकिङका क्रममा यान्त्रिक अवस्था ठिक नभएका तथा अत्याधिक धुँवा फाल्ने ३८ वटा सवारी साधनका चालकलाई कारबाही गरिएको हो ।
महाशाखाका प्रवक्ता प्रहरी वरिष्ठ उपरीक्षक राजेन्द्र प्रसाद भट्टका अनुसार अत्याधिक धुँवा फाल्ने १३ ओटा र यान्त्रिक अवस्था ठिक नभएका तथा धुँवा समेत फाल्ने २५ वटा सवारी साधन कारबाहीमा परेका हुन् ।
भट्टका अनुसार यातायात व्यवस्था विभाग मिनभवन, वातावरण विभाग सिंहदरबार तथा काठमाडौँ उपत्यका ट्राफिक प्रहरी कार्यालयबाट संयुक्त खटेको टोलीले आज बिहान बबरमहलमा ५४ वटा सवारी साधनलाई चेक गर्दा ३८ ओटा कारबाहीमा परेका हुन् ।
सवारी साधन मर्मत पश्चात् तोकिएको जरिवाना तिरी नियन्त्रणमा लिएका कागजपत्र फिर्ता दिइने उनले बताए । पछिल्लो समय ट्राफिक प्रहरीले सवारीसाधनको यान्त्रिक अवस्थाको पनि चेकजाँच गरिरहेको छ ।