राष्ट्रिय क्रिकेट टोलीबाट निलम्बित कप्तान सन्दीप लामिछानेमाथि परेको जबरजस्ती करणी मुद्दामा पीडित भनिएकी किशोरीले अदालतमा बयान (बकपत्र) दिएकी छिन् ।
मंसिर ७ र ८ गते किशोरीले जिल्ला अदालत काठमाडौंमा उपस्थित भएर न्यायधीशसमक्ष आफ्नो बयान दिएकी हुन् ।
पीडित किशोरीनिकट स्रोतले केटिएम दैनिकलाई दिएको जानकारी अनुसार उनले प्रहरीको जाहेरीमा उल्लेख गरेकै कुराहरू नै न्याधीशसमक्ष राखेको हुनाले पीडित होस्टाइल नभएको पाइएको छ ।
बलात्कारका विभिन्न मुद्दाहरूमा पीडितहरू होस्टाइल भएर जाहेरीमा एउटा कुरा उल्लेख गर्ने तर अदालतसमक्ष उपस्थित हुँदा अर्कै कुरा गर्ने प्रवृति पछिल्ला दिनहरूमा हावी छ ।
पीडितलाई डर, त्रास, ज्यान मार्ने वा बेपत्ता पारिदिने धम्की, मानसिक तनाव तथा आर्थिक प्रलोभन देखाएर जाहेरीमा उल्लेख गरेभन्दा भिन्न खालको बयान दिन लगाइन्छ ।
अभियोगपत्रमा उल्लिखित मागदाबी अनुसारको न्याय प्राप्त गर्न पीडितले अदालतमा उपस्थित भई जाहेरी तथा प्रहरीमा गरेको कागजलाई समर्थन गर्दै बकपत्र गरेको स्रोतले बतायो ।
भदौ ५ गते लामिछानेले आफूलाई बलात्कार गरेको भन्दै एक १७ वर्षीया युवतीले भदौ २१ गते प्रहरी प्रभाग गौशालामा उजुरी दिएकी थिइन् । उजुरी पर्दा पूर्वनिर्धारित कार्यक्रमअनुसार उनी क्यारेवियन प्रिमियर लिंग खेल्न वेस्ट इन्डिज पुगेका थिए । जाहेरी परेको एक महिनापछि सन्दीप नेपाल आएपछि प्रहरीले उनलाई विमानस्थलबाट पक्राउ गरेर न्यायीक हिरासतमा राखेको थियो ।
काठमाडौं जिल्ला अदालतले सन्दीपलाई कात्तिक १८ गते पुर्पक्षको लागि थुनामा पठाउने आदेश दिएको हो । अदालतको आदेशसँगै अहिले लामिछानेले सुन्धारा कारागारमा बन्दी जिवन विताइरहेका छन् ।