धरान उपमहानगरपालिकामा आमा समूहको निर्घात कुटपिटबाट घाइते भएकी एक महिलाको उपचारको क्रममा निधन भएको छ ।
धनकुटा घर भई केही वर्षदेखि धरान-१३ मा डेरी गरी बस्ने ४२ वर्षीया उषा राईको बीपी कोइराला स्वास्थ्य विज्ञान प्रतिष्ठानमा उपचारको क्रममा हिजो (मङ्गलवार) दिउँसो निधन भएको हो । कपडा सिलाई कटिङ गर्दै दुई छोरीहरू पाल्दै गरेकी महिलामाथि कात्तिक ३ गते जनजागरण आमा समूहका सदस्यले निर्घात रूपमा कुटपिट गरेका थिए ।
कुटपिट भएको भोलिपल्ट उनले छाती दुख्यो भन्दै रोई कराइ गरेपछि उपचारको लागि अस्पताल लगिएको थियो । मृतक महिलामाथि कुटपिट हुँदा छुट्याउन गरेका प्रहरीमाथि पनि आमा समूहका सदस्यहरू जाइलागेका थिए । प्रहरीले कुटपिटमा संलग्न भएको आरोपमा केही महिलाहरूलाई नियन्त्रणमा लिएको थियो । अस्पतालमा उपचार गराउँदा केही निको भएपछि आमा समूह र घाइते महिलाबिच मिलापत्र भएको बताउँछन् धरान उपमहानगर-१३ का वडाध्यक्ष नेत्र प्रसाद काफ्ले । काफ्लेले भने, ‘आमा समूहले उपचारमा लागेको सम्पूर्ण रकम बेहोर्ने र क्षतिपूर्तिबापत रु ३० हजार रुपैयाँ दिने सहमतिमा इलाका प्रहरी कार्यालय धरानमा मिलापत्र हो ।’
राईको निधनपछि मृतकका आफन्तले आमा समूहका सदस्यहरूको नाम किटान गरेर जाहेरी दिएको जिल्ला प्रहरी कार्यालय सुनसरीका निमित्त प्रवक्ता प्रहरी निरीक्षक दल कुमार राईले केटिएम दैनिकलाई बताए ।
राई भन्छन्, ‘मृतक राईको कुटपिटकै कारण निधन भएको हो वा उनमा अन्य दीर्घरोगपनि थियो भन्ने प्रश्नको उत्तर मेडिकल रिपोर्ट, पोस्टमार्टम रिपोर्ट र प्रहरीको अनुसन्धानमा आउनेछ । तर अहिले उनको निधन कुटपिटकै कारण भएको भन्दै किटानी जाहेरी परेको छ ।’
अहिले सामाजिक सञ्जाल युट्युब, फेसबुक लगायतमा महिलामाथि कुटपिट हुँदाको भिडिओ सार्वजनिक भएको छ । सार्वजनिक भएको भिडिओमा पाँच/सात जना महिलाहरू मिलेर एक महिलालाई निर्घात रूपमा कुटपिट गरेको देख्न सकिन्छ ।
स्वास्थ्य अवस्था बिग्रिएपछि राईलाई मङ्सिर ७ गते पुनः बीपी कोइराला स्वास्थ्य विज्ञान प्रतिष्ठानमा भर्ना गरिएको थियो ।
श्रीमानको निधनपछि सुरु भएको थियो झगडा
मृतक राईका श्रीमानको केही वर्षअगाडि निधन भइसकेको छ । राई परिवारको आर्थिक अवस्था कमजोर भएपछि विराटनगर अस्पतालमा रहेको मृतक श्रीमानको शव निकाल्नको लागि त्यहाँका गोविन राई नाम गरेका व्यक्तिले आर्थिक सहयोग गरेका थिए । राई परिवार तीनै व्यक्तिको जग्गामा टहरा बनाएर बस्दै आएको थियो ।
स्थानीय बासिन्दाको भनाई अनुसार गोविन राईको घरपरिवारका सदस्यबाटै बाटै मृतक उषा राई र गोविन राईको बारेमा चाहिने नचाहिने कुरा बाहिरिन थालेको थियो । एक-कान दुई कान हुँदै यी कुराहरू समाजमा फैलियो ।
घरमा किचलो भएपछि गोविन राईले मृतक उषाको परिवार बस्दै आएको आफ्नो जग्गा बेचे । त्यसपछि घरबार विहीन भएको उषाको परिवार त्यहीँ नजिकै रहेको कटुवाल थर भएको एक व्यक्तिकोमा डेरामा बस्न थालेका थिए ।
कुटपिट हुनुभन्दा दुई दिन अगाडि गोविन राईको परिवार र मृतकबिच जनप्रतिनिधिको रोहवरमा अव उप्रान्त दुई परिवार नभेट्ने सहमति भएको थियो । स्थानीयबासिका अनुसार गोविन्द राईले मानवीय नाताले श्रीमानको शव उठाउन मात्र सहयोग गरेका हुन् ।
प्रहरी निरीक्षक दल कुमार राईले घटनामा संलग्न भएका महिलाहरूको तीव्र रूपमा खोजी कार्य जारी रहेको बताए । यो समाचार तयार पार्दासम्म उनीहरूमध्ये कोही पनि पक्राउ परेका छैनन् ।