नेकपा एमालेका अध्यक्ष केपी शर्मा ओलीले खरानी पानीले ठूलठूला जुका मर्ने दाबी गरेका छन्। शनिबार प्रवासी नेपाली मञ्चको अधिवेशनलाई सम्बोधन गर्दै पूर्वप्रधानमन्त्रीसमेत रहेका अध्यक्ष ओलीले आफ्नो बाल्यकाल स्मरण गर्दै पानीमा खरानी घोलेर खाएमा ठूलठूला जुका मर्ने दाबी गरेका हुन्।
धनी राष्ट्रहरूको प्रदूषणले नेपाल जस्तो देश र यहाँका हिमालहरूलाई असर पुर्याइरहेको सन्दर्भमा उनले यस्तो बताएका हुन्। जसरी खरानीमा जुका मार्न सक्ने शक्ति रहेको हुन्छ त्यसरी नै धनी राष्ट्रहरूको प्रदूषणले नेपालमा प्रत्यक्ष असर पुर्याइरहेको उनको दाबी थियो।
राजनीतिक प्रसंगबारे कुरा गर्दै ओलीले वर्तमान सरकारसँग देश बनाउने कुनै पनि किसिमको मिसन-भिजन नभएको बताएका छन्।
स्वार्थको गठजोठबाट बनेको वर्तमान सरकारसँग देश बनाउने कुनै पनि किसिमको मिसिन, भिजन र गन्तव्य नभएको बताउँदै आगामी निर्वाचनपछि यस्तो सरकार बन्न दिन नहुने बताए। यो सरकारको विकल्प खोज्नु पर्ने उनले बताए। उनले दिशाहीन रहेको पार्टीहरूलाई सरकारमा ल्याउने कि भिजन भएको पार्टीलाई सरकारमा ल्याउने हो भनेर पनि प्रश्न गरेका छन्।
