नेकपा एमालेले मंगलबार चुनावी घोषणापत्र सार्वजनिक गर्दै छ । आगामी ४ मंसिरमा हुने प्रतिनिधिसभा र प्रदेशसभा सदस्य निर्वाचनका लागि मंगलबार एमालेले घोषणापत्र सार्वजनिक गर्न लागेको हो ।
घोषणापत्र सार्वजनिक गरिसकेपछि एमाले अध्यक्ष केपी शर्मा ओली चुनावी कार्यक्रममा सहभागी हुने तयारी गरेका छन् । विभिन्न क्षेत्रमा हुने करिब ५५ वटा सभामा उनी सहभागी हुने तयारी गरेको सचिवालयले जनाएको छ ।
कांग्रेस, माओवादी केन्द्र, एकीकृत समाजवादी, राप्रपासहित केही दलले घोषणापत्र सार्वजनिक गरिसकेका छन् ।
एमाले अध्यक्ष केपी शर्मा ओली ४० जिल्लामा करिव ५५ वटा चुनावी सभामा सहभागी हुने भएका छन् । ओलीले आफ्ना सहयात्री प्रत्यक्ष चुनावमा उम्मेदवार नरहेका पदाधिकारीहरू क्रमशः रामबहादुर थापा बादल, अष्टलक्ष्मी शाक्य, युवराज ज्ञवाली, सम्बन्धित प्रदेशबाट प्रतिनिधित्व गर्ने पदाधिकारी र इन्चार्जहरूलाई बनाउने भएका छन् ।
केन्द्रीय निर्वाचन परिचालन कमिटीको सचिवालयले १८ देखि २६ कात्तिकसम्म पूर्वको पाँचथरदेखि सुदूरपश्चिमको दार्चुलासहित ४० जिल्लाका ४० वटै सभामा ओली सहभागी हुने गरी चुनावी सभाका कार्यक्रम बनाएको हो ।
१५ कात्तिकमा निर्वाचन घोषणापत्र सार्वजनिक गरेलगत्तै ओली नौ दिन ४० जिल्लामा चुनावी दौडाहामा निस्किन लागेका हुन् । केन्द्रीय कार्यालयका सचिव भीष्म अधिकारीले अहिलेसम्म ओली ४० जिल्ला पुग्ने गरी चुनावी प्रचारसभाको प्रारम्भिक तयारी भए पनि सोमबारभित्र आवश्यकताका आधारमा कार्यतालिका हेरफेर हुन सक्ने बताएका छन् ।
ओलीले एक दिनमा तीनवटा चुनावी सभालाई सम्बोधन गर्ने भएका छन् ।