राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष एवं काठमाडौं क्षेत्र नम्बर–१ बाट प्रतिनिधिसभा सदस्य पदको उमेदवार रवीन्द्र मिश्रले देश जोगाउन राजा र राजसंस्था आवश्यक भएको बताएका छन् ।
आज (शनिबार) काठमाडौंमा आयोजित एक कार्यक्रममा बोल्दै यस्तै बताएका हुन् । मुलुकमा राजाको आवश्यकता औँल्याउँदै उनले ‘मान्छे मार्न हुने तर राजाले गल्ती नै गर्न नहुने ?’ भनी पटक–पटक प्रश्न गरे । मुलुक भूराजनीतिको भुमरीमा पर्ने भन्दै त्यसलाई जोगाउन पनि राजा र राजसंस्था अति आवश्यक रहेको मिश्रले जिकिर गरे ।
‘मान्छे मारेर आउनेले यो मुलुकमा शासन गर्न हुने, माडीमा दिउँसै बसमा बच्चा र वृद्ध जलाउनेले त्यहींबाट चुनाव जित्न हुने । पृथ्वीनारायण शाहको शालिक भत्काउनेले गोेरखामा गएर चुनाव जित्छु भन्न हुने । अनि, यो देशमा राजाले गल्ती गर्न नहुने ? संसारमा गल्ती नै नगर्ने राजा कहाँ छन् ? मलाई देखाउनुस् ।’
उनले भने, ‘राजा मेरा लागि चाहिएको होइन । तर, यो देशका लागि राजनीति गर्ने हो भने, यो देश जुन प्रकारको भूराजनीतिमा पर्दैछ, पहिला हामी अमेरिका–रुसको शीतयुद्धको कुरा गथ्र्यो, अब त्यो शीतयुद्ध सरेर दक्षिण एसियामा आउँदै छ । दुईतिर चीन र भारत उठेर आउँदै छन् । अनि, त्यसमा पश्चिमा चासो छ । नेपाल जहाँ, कुनै क्षयीकृत नभएको संस्था छैन । त्यो भूराजनीतिको भुमरीमा परेको देशलाई जोगाउन राजा र राजसंस्था चाहिन्छ ।”
उनले नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ लाई ‘ज्यानमारा’ को संज्ञा समेत दिएका छन् । उनले प्रचण्डमाथि चितवनको माडीमा बसमा बालबालिका र वृद्धवृद्धा जलाएको, मुलुकमा मान्छे मारेर शासन गरेको आरोप लगाएका हुन् । उनले पृथ्वीनारायण शाहको शालिक भत्काउनेले गोरखामा चुनाव जित्छु भन्ने गरेको भन्दै आक्रोश समेत व्यक्त गरे ।
