नेपाली राष्ट्रिय क्रिकेट टोलीका निलम्बित कप्तान सन्दीप लामिछाने तिहारभरी प्रहरी हिरासतमा बस्नु पर्ने भएको छ ।
बलात्कार आरोपमा पक्राउ परेका क्रिकेटर सन्दीप लामिछानेलाई थप दुई दिन हिरासतमा राखेर अनुसन्धान गर्न प्रहरीलाई अनुमति प्राप्त भएसँगै उनी तिहारभरी हिरासतमा रहनुपरेको हो ।
गत असोज २० पक्राउ परेका उनी प्रहरी वृत्त गौशालाको हिरासतमा छन् । आइतबार चौथोपटक म्याद थप्दै थप दुई दिन उनलाई हिरासतमा राखेर अनुसन्धान गर्न प्रहरीलाई जिल्ला अदालत काठमाडौंले अनुमति दिएको छ ।
यसअघि पहिलो पटक सात दिन, दोस्रो पटक पाँच दिन र तेस्रो पटक चार दिन हिरासतमा राख्न अनुमति दिएको अदालतले आइतबार चौथो पटक थप दुई दिन हिरासतमा राखेर अनुसन्धान गर्न समय दिएको हो । आज सरकारी कार्यालय खुल्ने अन्तिम दिन हो भोलीदेखि आइतबारसम्म सार्वजनिक बिदा भएकाले अब सोमबार मात्र सन्दीप अदालतमा उपस्थित हुनेछन् । दुई दिन म्याद थप भएपनि सन्दीप भने सात दिन हिरासतमा बस्नुपर्ने भएको हो ।
त्यसपछि थुनचेक बहस हुनेछ । थुनचेक बहसपछि अदालतले धरौटी लिएर साधारण तारेखमा रिहा गर्ने वा पुर्पक्षको लागि थुनामा पठाउने दुईमध्ये एक आदेश दिनेछ । धरौटीमा रिहा भएको खण्डमा सन्दीप बाहिरै बसेर मुद्दा लड्न पाउनेछन् भने पुर्पक्षको लागि थुनामा राख्ने आदेश आएमा उनी बन्दी बन्नेछन् । जिल्ला अदालतको यस आदेशविरुद्ध सन्दीपले उच्च अदालतमा मुद्दा लड्न भने पाउँछन् ।
पल शाहलाई जिल्ला अदालतले पुर्पक्षको लागि थुनामा राख्ने आदेश दिएसँगै उनी बन्दी बनेर मुद्दा लडिरहेका छन् ।
गत भदौ २१ मा एक नाबालिगले लामिछानेविरुद्ध जबर्जस्ती करणीको आरोपमा प्रहरी वृत्त गौशालामा उजुरी दिएकी थिइन् । उनको उजरीमा सन्दीपले आफूलाई भदौ ५ गते गाडीमा राखेर नगरकोट पुर्याएको र सोही दिन राति काठमाडौंको एक होटलमा राखेर बलात्कार गरेको उल्लेख छ । बलात्कारको उजुरी पर्दा सन्दीप क्यारेबियन लिग क्रिकेट खेल्न नेपाल बाहिर थिए ।
लामिछाने २० असोजमा काठमाडौं फर्किएका थिए । प्रहरीले त्रिभुवन अन्तर्राष्ट्रिय विमानस्थलमा ओर्लिने वित्तिकै उनलाई पक्राउ गरेको थियो । त्यतिबेलादेखि नै सन्दीप प्रहरी वृत्त, गौशालाको हिरासतमा छन् ।
