मकवानपुर क्षेत्र नम्बर १ का नेकपा एमालेका उम्मेदवार राप्रपा नेपालका अध्यक्ष कमल थापाले मुलुकमा विदेशी दबाब र प्रभावलाई रोक्न राष्ट्रवादी सरकार बन्नु पर्ने बताएका छन् । देशी विदेशी शक्तिहरूलाई रोक्न एमालेको नेतृत्व आवश्यक रहेको उनले बताए ।
नेकपा एमाले हेटौँडा १२ को निर्वाचन परिचालन कमिटीद्वारा आयोजित विस्तारित बैठकलाई सम्बोधन गर्दै रोक्न राष्ट्रवादी शक्ति एकजुट हुनुपर्ने थापाको भनाइ छ।
मुलुकको स्वाधीनता र स्वाभिमानको रक्षा, राष्ट्रियताको संरक्षण, प्रजातन्त्रको सुदृढीकरण र आर्थिक समृद्धि, भ्रष्टाचार अन्त्यको निमित्त राष्ट्रवादी शक्ति एकठाँउमा उभिनुको विकल्प नरहेको भनाई राखे ।
मुलुकमा बेथिति र कुशासन ल्याउने शक्ति जनताले चिन्नुपर्ने भन्दै थापाले देशमा भइरहेका गलत क्रियाकलाप रोक्न एमालेको नेतृत्वमा सरकार बन्नुपर्ने धारणा राखे । मकवानपुरको अपुरो विकासको काम सम्पन्न गर्न चुनावी मैदानमा एमालेसँगको सहकार्यमा जनताको सेवा गर्ने प्रस्ट पारे । जिल्लामा सुरु भएका धेरै कामहरू पूरा गर्न बाँकी रहेकोले यसलाई सम्पन्न गर्न सबै सुर्य ध्वजाबाहक उम्मेदवार जित्नु अनिवार्य रहेकोमा थापाले जोड दिए ।
नेपाली कांग्रेस नेतृत्वमा भएको गठबन्धन निहित स्वार्थका लागि मात्र भएको उनको भनाई छ । देशको लागि नभई पार्टी र सत्ताको स्वार्थका रुपामा गठबन्धन अगाडि बढेकोले यसलाई परास्त गर्न जनता एक ठाउँमा उभिनुपर्ने बताए ।