नेकपा माओवादी केन्द्रका अध्यक्ष पुष्पकमल दाहाल प्रचण्डकी पत्नी सीता दाहाल अस्वस्थ भएपछि बुधबार अस्पताल भर्ना भएपछि प्रचण्डका पूर्वनिर्धारित कार्यक्रम स्थगित गरिएको छ ।
स्वास्थ्य अवस्थामा समस्या देखिएपछि हिजो उनलाई ललितपुरको मेडिसिटी अस्पतालमा भर्ना गरिएको हो। पार्टीका उपाध्यक्ष नारायणकाजी श्रेष्ठले दाहालको स्वास्थ्यमा समस्या देखिएपछि मेडिसिटी अस्पतालको आइसीयूमा भर्ना गरिएको जनाएका छन् । सीता माओवादी केन्द्रकी केन्द्रीय सल्लाहकार समेत हुन्।
प्रचण्डले पूर्वनिर्धारित चुनावी कार्यक्रम स्थगित गरेका छन्। आज प्रचण्ड सिन्धुली जाने कार्यतालिका थियो। तर, सीताको स्वास्थ्यवस्थालाई ध्यानमा राख्दै आजको कार्यक्रम स्थगित गरिएको छ।
दाहाल पार्किन्सन्स जस्तो लक्षण भएको एक जटिल रोगबाट पीडित छिन् । उक्त रोगलाई चिकित्सकीय भाषामा प्रोग्रेसिभ सुपरन्युक्लियर पाल्सी (पीएसपी) भनिन्छ । पिएपी एक दुर्लभ शारीरिक समस्या हो जसका कारण मानिसको मानसिक सन्तुलन बिग्रिनुका साथै हिँड्न, बोल्न र निल्नसमेत कठिन हुने गर्छ ।
यसअघि दाहालको उपचार अमेरिकाको जोन्स हप्किन्स आउटपेशन्ट सेन्टरमा र सिंगापुरमा समेत उपचार गरिएको थियो । पत्नीको उपचारको लागि अध्यक्ष दाहालले धेरै मेहनत गर्दै आएका छन् । केही वर्ष अगाडी पत्नी सीता दाहाललाई उपचारका लागि भारतको हरिद्वारस्थित बाबा रामदेवको आश्रममा लगिएको थियो ।
विभिन्न देशमा सीताको उपचार भए पनि २० को १९ नभएपछि आयुर्वेदिक पद्धतिबाट उपचार गर्दा केही राहत हुन्छ कि भनेर रामदेवकोमा उपचार गरिएतापनि त्यसले खासै सुधार भने गर्न सकेको थिएन । मधुमेह र उच्च रक्तचापबाट समेत पीडित भएकी सीता छोरा प्रकाश दाहालको निधनपछि कमजोर भएकी हुन्।
